Dia 20 di september na nivel mundial a conmemora e Dia Mundial di Libertad di Expresion, un derecho protegi den varios tratado internacional cu ta compronde e libertad di busca, ricibi y publica tur tipo informacion, sea a di manera oral, escrito of di manera artistico, pero tambe ta suheto na cierto restriccion.
Por mira for di algun tempo caba cu e palabra “libertad di expresion” ta den noticia pa diferente caso unda cierto periodistanan ta surpasa e barera di libertad di expresion y ta usa articulo 19 di Declaracion Universal di Derechonan Humano di Organisacion di Nacionnan Uni e cual ta indica cu libertad di expresion ta un derecho fundamental y “tur individuo tin derecho na libertad di opinion y di expresion; e derecho aki ta inclui pa no causa molestia na ni un individuo a base di su opinion, investiga y ricibi informacion y opinion y publica esakinan, sin limitacion di frontera via cualkier medio di expresion.”
Pero den esaki, tambe mester tuma na cuenta articulo 5: “ta prohibi pa ley tur propaganda na fabor di guera y tur discurso unda ta defende odio nacional, racional of religioso cu ta constitui incitacion na violencia of cualkier otro accion ilegal contra cualkier persona of grupo di persona, sin ni un motibo, incluyendo rasa, color, religion of origen nacional” un punto cu for di e punto di bista etico periodistico, cierto medionan di Aruba ta falta pa conoce.
Ta normal pa programanan di radio di algun medio na crusa e liña aki unda segun pa nan esey ta libertad di expresion pero ta importante pa menciona cu debi cu no tur hende ta pensa of tin e mesun ideologia, religion, color of hasta nacionalidad ta bon pa nan haya insulto, pa nan wordo lastra y hasta falta respet di otro debi cu pa nan esey ta libertad di expresion.
Consolidacion y desaroyo di democracia ta depende di existencia di libertad di expresion manera Comision Interamericano di Derechonan Humano ta indica, e derecho aki ta esencial pa desaroyo de conocemento y entendimento di e pueblonan, cu lo conduci na un comprension y cooperacion berdadero entre nacionnan.
Entre e principionan cu Comision Interamericano di Derechonan Humano den respaldo na Relatoria Special pa Libertad di Expresion ta trece dilanti ta señala cu acceso na informacion cu ta den poder di Estado ta un derecho fundamental di individuonan. Estadonan ta OBLIGA di garantisa ehercicio di e derecho aki, y principio ey cu ta e number 4, solamente ta admiti limitacion excepcional cu mester ta estableci previamente pa ley den caso tal cu lo por existi un peliger real cu por menasa siguridad nacional y p’esey Estado no por duna informacion.
Den esaki tambe ta importante pa destaca cu no tur informacion cu periodistanan ta puntra of ta investiga ta haya contesta di Estado of di instancianan, den esaki ta existi cierto “escogencia” di ken ta esnan cu ta mucho critico y den esey ta depende si ta haya contesta di Estado of no. Algo cu UNESCO tambe ta papia di dje pero na Aruba lamentablemente politica ta tur caminda y esey ta hunga un rol hopi grandi den esaki.
Actividad periodistico mester funciona cu conducta etico, e cual den ningun caso por wordo imponi pa Estado.
Den e principio number 9 ta indica cu asesinato, secuestro, intimidacion, menasa na periodistanan, asina como destruccion di material di medionan di comunicacion, ta viola e derechonan fundamental di personanan y ta limita severamente libertad di expresion, ta deber di Estado pa preveni y investiga e hechonan aki, sanciona nan autor y sigura cu e victima lo haya un reparacion adecua.
Un ehemplo di esaki ta e caso di un periodista cu ta den man di Ministerio Publico for di aña pasa unda un otro periodista a falta su respet, a lastr’e, a discrimin’e, publica su potret den medionan resaltando e nacionalidad loke a causa un serie di comentarionan negativo riba rednan social cu e obhetivo di incita odio contra dje lo cual a logra, te ainda no ta conoci con a para cu e caso aki, Ministerio Publico ta keto bay trankil sin bisa nada di e caso.
Internet a habri camindanan nobo pa gruponan y personanan por busca y publica nan informacion y nan ideanan, sinembargo, tambe ta un frontera nobo den cual e libertad di expresion ta presentando desafionan nobo.
E dia mundial aki ta pretende visibilisar acosamento y encarcelamento di personanan cu pa eherce nan derecho di libertad di expresion, ta violando nan derechonan fundamental relaciona cu e buskeda of publicacion di informacion, ideanan y opinion sin represalia.
E eleccion di e fecha aki tin su origen na 20 di september di 1870, ora forsa patriotico Italiano y Garibaldino a protagonisa e episodio “Brecha di e Porta di Pia” na Roma y nan a derota e forsanan di Vaticano cu tabata alia cu Imperio Frances.
E dia ey a nifica e caida definitivo di e poder temporal di e Papa y di su regimen politico como “derecho divino” y un triunfo grandi pa forsanan democratico y republicano. Simbolicamente tambe a nifica e derota di oscurantismo y speransa di renacemento di luz, cu ta representa e triunfo di e Rason y di Libertad di Consenshi.
