Ayera tardi, Marriott Hotel a tene su ‘LGBT Culture Day’. Esaki a tuma luga den nan ballroom. Director di relacionnan multicultural Seema Jain y co-presentador Hendrik Croes a splica tema tocante con pa comunica efectivamente cu culturanan, enfocando nan mes cu cultura LGBT.

Sra. Jain a cuminsa e evento cu algun pregunta pa esnan presente. El a yega di papia tocante culturanan di China, Hapon, India, Hudiu, Medio oriente y mas pero e biaha aki e tema tabata enfoca riba LGBT (Lesbian, gay, bisexual, transgender) y con pa trata cu guests cu bin sea na un hotel of compania, pa asina sa con pa trata cualkier persona di diferente cultura.

Sr. Croes tambe a duna palabra tocante su bida den pasado, con homofobico e tabata antes, con el a cuminsa cambia pa por acepta ken e ta y con e proceso di ‘come out’ a bay pe. El a splica tambe cu pa motibo di e cultura y religion di Aruba, e persona no ta abierto ainda pa bisa of acepta cu e ta LGBT.

Stacey Banfield kende ta e Marketing Communications Manager ta splica cu Marriott hotel ta sumamente contento di a organisa nan prome evento di LGBT como dia di cultura, unda cu nan a trece un key speaker pa duna un presentacion special locual ta e cultura di LGBT.

Sra. Banfield ta splica cu esfuerso aki hunto cu Marriott cu ta uza nan lema di pone hende semper na prome luga y tambe pa sirbi nan comunidad y trece conscientisacion pa promove inclusividad, igualdad y diversidad pa nos comunidad. E ta splica cu na hotel Marriott ta importante pa tur hende sinti nan mes cu tin oportunidad pa ta nan mes, pa tin e libertad pa ta orguyoso di ken cu nan ta. Nan kier crea un ambiente sigur pa nan guest, trahado y pa tur nos localnan, di tal forma cu nan ta sinti nan mes na cas.

Marriott ta e prome hotel cu ta organisa un evento asina cu ta dedica pa LGBT. “Marriott ta e hotel cu ta organisa semper diferente dia di cultura. Sea persona ta di India of cualkier otro pais cu tin diversidad di cultura. E ta un evento pa asina conscientisa otro hende di e culturanan cu tin. Pa por comunica cu cualkier persona cu yega di un pais. Mas bo sa, mas bo ta conoce hende si tradicion. Pa nos como hotel esey ta sumamente importante”, sra. Banfield ta bisa.

Bon Dia Aruba a puntra sra. Banfield con e ta wak Aruba para cu e tema di LGBT. E ta splica cu e ta kere Aruba cu despues di hopi tempo por nota cambio. Tambe accion di promove inclusion y diversidad den nos comunidad sigur ta yudando ‘pa tur hende ta consciente di con importante ta pa trata tur otro igual’. Sra. Banfield ta splica cu e mensahe ta cla cu e comunidad LGBT no kier wordo trata diferente. “Nan no kier niun special treatment. Nan no kier haya mas beneficio cu otro persona ni tampoco nada extra. Nan kier wordo trata manera tur hende. Pa henter comunidad wordo trata mescos.”

Sra. Banfield ta splica cu hopi bes nan manera hotel ta wordo puntra con pa trata un guest LGBT, di cual su contesta tabata: “Masha facil, manera cu bo ta trata cualkier guest cu no ta LGBT, tur mescos.”