(AP) – Creador grandi di bateria Sur Koreano LG y creador di vehiculo Hapones Honda lo enverti 4.4 biyon dollar den negosho hunto na Merca pa produci bateria pa Honda su vehiculonan electrico den e mercado Norte Americano, segun e dos companianan a bisa dialuna.
E planta su sitio te ainda no a ser dicidi, sinembargo lo cuminsa cu construccion den comienso di aña 2023, cu produccion en masse cuminsando pa fin di aña 2025. Posiblemente e planta lo ta na Marysville, Ohio of Greensburg, Indiana cual ta unda Honda tin fabricanan grandi unda cu nan ta traha modelnan popular manera Accord, CR-V y Civic.
“E negoshi aki conhuntamente cu Honda, cual tin un reputacion significante, ta un otro logro den nos strategia pa promove e transicion pa vehiculonan electrico cual ta creciendo lihe den e mercado Norte americano,” LG Energy Solution Chief Executive Youngsoo Kwon a expresa.
E planta lo produci baterianan exclusivamente pa Honda su vehiculonan fabrica na Norte America, incluyendo e compania su marca di luho Acura, segun e declaracion.
Honda su planta ta parti di un moda cu ta aumentando, unda cu fabricantenan di vehiculo ta anunciando fabrica di bateria Mericano mirando cu kier establece un cadena di suministro domestico pa e siguiente generacion di vehiculo. Ford, General Motors, Toyota, Hyundai-Kita, Stellantis y VinFast ya caba a anuncia plan pa 10 planta di bateria na Merca.
