Ayera 6 di juli Bon Dia Aruba a publica un articulo for di punto di bista di dos miembro activo di fundacionnan pa yuda bestianan abusa of bandona. Nos a tuma contacto cu Parlamentario Donny Rasmijn kende ta activo tras di e leynan aki.
Sr. Rasmijn e ta bisa cu e leynan aki no ta wordo enforsa. Cuerpo policial ta esun cu tin cu haci esaki, pero nan tin otro cosnan cu tin mas prioridad, manera e parti di criminalidad. No ta kita cu esey no ta importante, pero si falta pa pone mas importancia pa e proteccion di bestia. E ta reconoce si cu ultimo tempo aunke cu no ta haci control riba nan mes, si por a mira mas movecion por ehempel si haya un melding. Ora cu e melding drenta, polis ta bay na e sitio y a duna e boet necesario.
Na momento cu yega na e sitio y mester kita e bestia for di e doño, polis ta pidi ayudo di un di e fundacionnan pa por tuma e bestia cerca nan. Locual ta dificil ta, cu hopi di nan no tin luga pa pone e bestianan y ey ta unda e problema ta. Sr. Rasmjin ta bisa cu a pidi tereno pa asina crea un espacio unda cu e bestianan aki por keda ora nan wordo rescata y e ta den proceso pero, e proceso ta birando uno hopi largo. Sr. Rasmijn tambe ta di opinion cu Aruba falta educacion riba e tema, falta pa duna hende mas informacion con pa actua y cua ta e opcionnan cu nan tin ora ta bin na nan mascotanan.
Leynan den proceso
E parlamentario ta bisa cu en berdad ARA tabata den parlamento durante e proceso di loke a bira ley pa cacho. E ta bisa cu en berdad hopi punto a wordo treci padilanti di parti di ARA. Pero ya cu e ley a tarda, sr. Rasmijn a tuma esaki como e prome stap, y pa e di dos stap lo tin hopi mas pa traha riba dje por ehempel incluyendo e sugerencianan cu a bin di parti di ARA. Locual ta wardando ariba dje aworaki ta e oproepingsprocessverbaal (OPV), cual ta ora cu un polis por saca buki y duna boet, esaki ta wardando for di DWZ y OM, pero ta algo cu ta tardando demasiado pa por keda cla y ta strobando bastante. Esaki ta algo cu manera e keda cla, e por wordo uza hopi mas miho pa polisnan.
Costonan di sterilisacion
Sr. Rasmijn ta di acuerdo cu prijsnan pa sterilisa un bestia ta algo caro. Por tabata tin algun campana cu a duna doñonan di bestia un prijs miho pa haci esaki, pero e realidad ta cu e no ta algo permanente y e problema ta sigui. Esey ta pone cu ora cu esunnan cu kier tin un mascota nan ta pens’e hopi biaha prome cu nan bay paga e prijs ey pa sterilisa e bestia. E ta tarda of nan no ta yega nunca pa hacie. Locual mester bay wak ta dicon e prijsnan ta asina halto y for di eynan pa wak si por haci cambionan y baha e costonan pa hacie uno mas accesibel.
Subsidio pa fundacionnan
E parlamentario ta bisa cu el a presenta un mocion durante tratamento di presupuesto aña pasa, pa asina gobierno por pone un suma por ehempel di mas o menos 150 mil florin pa aña pa yuda e fundacion nan cu ta activo. Esey no a tuma luga ainda, pero e ta un mocion cu ta aden y ta spera cu pronto e lo tuma luga. Aunke cu e fundacion nan aki ta haci nan best y ta traha hopi duro pa yega nan un suma pa haci locual nan kier haci den e area, lo ta bon pa tin un ayudo.
