Diasabra atardi un grupo di hende bao guia di entre otro sra. Vivian Krosendijk kende ta un activista conoci den e area di derechonan humano y miembronan di fundacion Lisette Gomes Contra Abuso Sexual di Mucha, a marcha na Bestuurskantoor. Nan a vocifera pa ayudo y comprension cu e angustia cu nos pueblo ta bibando aden cu ta keda crece relaciona cu abuso di mucha.

E grupo a wordo ricibi pa minister di Asuntonan Social Glenbert Croes (MEP) y minister di Husticia Andin Bikker (POR), kendenan a ricibi tambe e manifiesto di e grupo. Cu esaki e grupo cu tabata inclui mayornan di e mucha cu a wordo maltrata na scol di Ayo algun siman pasa, kier tin e siguransa cu presidente di parlamento percura pa asina cu aña 2018 habri bin e prome reunion publico pa trata leynan di abuso di menor. Pa e ley minimo segun nan di cinco aña, y ley maximo di bida largo. Den su totalidad a wordo bisa caba por medio di e gobierno y ministerio aki cu mester bin un modernisacion den leynan di Aruba. “Pa loke ta trata e leynan specifico pa cumpli cu e tratadonan internacional di derechonan di mucha, mi ta kere den un par di luna nos por caba cu e proceso akinan,” minister Bikker a bisa.


Trahando riba cambionan den ley
Minister di Husticia a enfatisa cu e tragedianan nacional cu a sosode e aña aki a haya atencion di gobierno cu mesora a institui comisionnan pa trata cu esaki. E comision ya a traha un rapport pa gobierno di cual nan a duna e grupo di manifestantenan un copia diasabra mes.

“Los di esey, di parti di ministerio di Husticia, nos ta trahando diligentemente riba cambionan den ley,” minister Bikker a bisa. Apart di e tragedianan nacional aki cu a asota nos isla y shock nos comunidad, minister Bikker a bisa cu ya tabata den plan pa introduci cambio den e castigo minimo. A institui un comision pa por traha riba cambio di leynan riba otro tereno, entre otro pa e victima tin derecho di por asisti ora di casonan penal (spreekrecht van slachtoffer.) Asina tin mas cambionan cu mester haci pa cumpli cabalmente cu e tratadonan pa loke ta trata derechonan di mucha.

E mandatario a sigui bisa cu desde 2009 tabata tin un rapport unda cu Aruba no a score bon den implementacion di e tratado akinan y nan diligentemente a pidi pa e conceptonan di ley wordo traha pa cuminsa cumpli cu nan. “Nos tin e compromiso no cu palabra so, si no cu hechonan, cu si nos kier duna Aruba un chens pa no cay den e abismo cu otro islanan pasobra nan no a actua na tempo. Cu Dios su poder nos ta na tempo pa salba futuro di nos yiunan, y nos ta actuando aworaki,” e mandatario a bisa.

Plan di emergencia
Pues diasabra e manifestantenan a haya un copia di e rapport/plan di emergencia cu tur sectornan social y diferente ministerio. Cu caracter di urgencia a trece tur instancia concerni hunto pa kibra cabes riba kico ta bayendo fout, kico mester, cuanto e ta costa y pa pone riba papel. “Nan a bin cu un recomendacion unda nos a bay conseho di minister cu ne, e decision di gobierno di Aruba riba 5 di december pa implementa e dies punto di accion inmediato,” minister Glenbert Croes a bisa.

E siman aki e lo mester haya e reportahe di avance unda cu ta defini kico tur mester wordo haci, e parti legislativo, e costonan y rol di parlamento pa implementacion. “Na momento aki nos no ta haciendo suficiente como pais pa cuida, protege nos muchanan y castiga esunnan cu ta agredi. No solamente nos muchanan, pero mamanan y tatanan cu ta wordo agredi, famianan cu ta wordo kibra, nos bieunan, e cos aki no por pasa,” minister Croes a bisa.


Maltrato na scol Ayo
Un rato despues cu tur hende a termina nan declaracionnan, e minister encarga cu asuntonan social a invita e tata di e criatura cu su parti intimo a wordo malamente maltrata na scol Ayo algun siman atras. E minister a bay sinta un rato cu e mayor Celvin Tromp pa scuch’e mesora riba su preocupacionnan.

Bon Dia Aruba tambe a combersa cu e mayor kende a bisa cu e djis kier claridad. Su yiu a wordo maltrata pa un otro mucha na scol unda cu su parti intimo a wordo primi den tal forma cu el a hera perde esaki. Un luna despues di e incidente e mucha no ta bayendo e scol mas, su situacion ta mas miho y awor ta buscando ainda un otro scol pa e mucha. E mayornan no kier pa e bay e scol ey mas.

“Mi a cana tur caminda. Mi a bay scol, nan no a logra saca nada. Nan manera antipatico di trata cu mi. Mi a hiba caso polis, pero mi tin cu warda ora nan bin for di vakantie pa nan sigui atende cu e caso. Pues no tin persona cu a keda encarga pa atende cu e caso. Mi yiu a menciona nomber di mucha cu a hacie, cu el a pasa den klas, pues ami ta puntra unda e docente ta? E no por a wak nada? Niun rato e docente a tuma contacto cu mi pa papia cu mi of pa wak con e mucha ta. Mi ta spera respuesta, mi kier claridad y pa e mucha cu a haci e acto aki haya un ayudo pasobra e mes por ta victima di un abuso”, e mayor sr. Tromp a splica Bon Dia.