Durante un patruya rutinario a bordo di un Metal Shark, e personal di Wardacosta a nota dos homber cu tabata sambuya y saca kreeft y calco for di awa. E hombernan tabatin un cantidad grandi di kreeft y calco hunto cu nan, cu tabata demasiado chikito. Pa ley, e ‘visserijlandsbesluit’, ta prohibi pa saca calco mas chikito cu 18 centimeter y kreeft mas chikito cu 25 centimeter for di awa pa consumo.
E motibo pa esaki ta cu e animalnan aki ta ser menasa cu extension. E calco y e kreeft chikito no ta haya chens pa desaroya bira adulto y como tal no por reproduci. E ley ta prohibi pesca tambe riba kreeft cu ta cambiando su casca of kreeft cu ta den fase di reproduccion.
