Aruba lo mester tabatin su Ombudsman na Juni. Asina Presidente di Parlamento Juan ‘Ady’ Thijsen a reacciona riba e ponencia di Nationale Ombudsman di Hulanda, Reinier van Zutphen. Recientemente van Zutphen a urgi comunidad di Aruba pa organisa accion pa forsa Gobierno bin cu e Ombudsman.

Thijsen a bisa Bon Dia Aruba cu e tabata bao di tur conviccion cu pa Juni e aña aki, Aruba lo tabatin su Ombudsman ademas di henter e ekipo pa sostene e institucion. Manera ta conoci, Aruba ta e unico pais den Reino Hulandes sin un Ombudsman. Un Ombudsman ta un institucion halto, mesun nivel cu Raad van Advies, cu ta para pa interes di ciudadano. Ciudadanonan por acudi na e Ombudsman ora cu decisionnan di Gobierno ta afecta nan negativamente.

“E ley a pasa y locual a keda falta ta un cambio den Constitucion, pero esey no ta un problema pasobra tur hende ta para pa e institucion,” mr. Thijsen a splica.

Sinembargo, e caida di Gobierno y diferente otro circunstancia a haci dificil pa nombra e Ombudsman, segun mr. Thijsen.

Prome Minister Evelyn Wever di su banda a splica cu Gobierno ta inclui e gastonan pa e institucion di Ombudsman tur aña, pero ta na Parlamento pa finalisa e proceso. “Ta Parlamento ta encarga cu e proceso. Ami ta djis pone e fondonan disponibel. Parlamento ta encarga cu e resto.”

Pero, e forma con mr. Thijsen a splica, Parlamento mes no ta cla pa e nombramento. Es mas mr. Thijsen a bisa cu e mes no ta mucho sigur ainda cuanto Gobierno a pone riba presupuesto pa e instituto Ombudsman. “Corda cu ta henter un organisacion mester bin cune.”

Expertonan a bisa Bon Dia Aruba cu mientras cu ta Parlamento ta encarga pa sigura cu e Ombudsman ta regla pa ley, ta e organo ehecutivo, esta Gobierno y particularmente Minister pa Asuntonan General mester tuma e pasonan concreto pa nombramento. Ta Gobierno mester nombra un kwartiermaker, esta un persona pa prepara e proceso y busca candidato. Unabes cu tin e candidatonan pa Ombudsman, un comision consistiendo di Presidentenan di Corte Comun, Contraloria General y Raad van Advies ta scoge esnan cu ta keda nomina na Parlamento cu na final ta nombra e Ombudsman.

Presupuesto 2021

Di otro banda, Parlamento ta hopi enfoca riba Presupuesto 2021. Ady Thijsen a bisa cu e tabata kier a trata Presupuesto e siman aki, pero ainda falta algun contesta for di Gobierno. Ta bin acerca cu un delegacion di Parlamento encabesa pa mr. Thijsen lo biaha riba 20 di Mei pa Hulanda, unda lo atende cu e tema di geschillenregeling den Eerste Kamer. E delegacion di Aruba lo ta bek dia 4 di Juni. Pero entre awor cu 20 di Mei, “tin suficiente tempo pa nos por trata Presupuesto 2021,” Ady Thijsen a comenta.