Ley di restructuracion salarial di maestronan ta uno cu apesar cu e ta bin canando pa añanan un trayecto basta lago, ainda no a wak luz di dia.

E ley aki no a wordo concretisa ainda, aunke e ta practicamente cla. Finalmente ora e fraccion di AVP specialmente kier a trate, dos miembro di parlamento actual di oposicion y di e partido cu lo forma parti di e gobierno nobo a pidi gobernador di Aruba solicita parlamento pa abstene di trata cualkier ley pendiente, entre nan esun di restructuracion salarial di e docentenan. Esaki te ora cu un parlamento y un gobierno nobo ta sinta entrante 27 di october awor.

Parlamentario Sneek
Pa parlamentario Marlon Sneek no tin motibo pa esaki, ya cu e ley ta cla caba y di otro banda presupuesto a keda asigna pe. Tambe e no ta haya motibo pasobra parlamento no ta keda demisionario.

Sinembargo evaluando e peticion y pa e bon marcha di e proceso di transicion aki den ambos poder tanto ehecutivo como legislativo, nan ta abstene di trata e ley aki te ora cu parlamento nobo ta sinta. El a bisa cu nan ta leynan cu tabata cla pa trata nan prome cu eleccion. Pero nan a abstene di trate pa evita cu esaki lo wordo hinca den un contexto politico di campaña di eleccion. Tambe sr. Sneek a solicita pa e ley aki lo wordo trata mas pronto posibel den e constelacion nobo di Parlamento.

Bon Dia Aruba a yega di publica varios articulo rond di e ley aki treciendo diferente version of opinion tanto di sindicato SIMAR, tambe di e minister di enseñansa, y di presidente actual di parlamento.

Parlamentario Lopez-Tromp
Tambe nos a haya un declaracion di parlamentario Marisol Lopez-Tromp kende hunto cu su colega, Andin Bikker a haci entrega di un carta na gobernador cu e peticion ya menciona. Sra. Lopez-Tromp a argumenta cu nan a solicita esaki ya cu un ley di e embergadura aki tin un peso extra pa cualkier presupuesto di gobierno.

El a laga habri e posibilidad cu SIMAR lo haya tur e detayenan. “Esaki ta algo sigur pa sosode”, el a bisa. Tambe tur e otronan parti cu ta relevante den e asunto aki pa asina e ley wordo miho posibel trata den Parlamento.

E ta haya cu ora cu bo ta den e proceso di transicion aki bo tin ministernan cu ya caba ta demisionario, y un proceso caminda ta bay tin gobernantenan nobo y un constelacion nobo den Parlamento, bo por trata cos relativamente chikito y cosnan cu tin cu sigui cana. Pero mester reconsidera ora cu tin decisionnan cu tin impacto riba e parti financiero di e pais. “Of cambionan cu e gobernantenan nobo ainda tin cu fiha den nan maneho, si nan ta bay haci esey si of no, a base di plan di gobernacion”. Pues e ta haya cu ta mas cu normal cu mester warda pa e gobierno nobo haci esaki.

El a bisa cu nan a nota cu presidente di Parlamento kier a yama pa bin cu e reunion pa trata e ley aki di structura salarial di e maestronan net den e proceso cu ta andando despues di eleccion. Den su caso, sra. Lopez-Tromp, ta laga sa cu esaki no por, mirando e puntonan di agenda cu tin aspectonan cu ta bay asina leu cu tin cu bay lanta te hasta departamentonan nobo aworaki den pura.

E ta kere tambe cu gobierno kier nombra aworaki su personal den pura den e departamento aki faltando poco tempo pa e cambionan ,tanto den gobierno como den Parlamento. Aunke e ta consciente cu e ley aki tin hopi tempo cu kisas ta wardando, e tin un impacto ariba e parti financiero y riba e maneho cu ta bay tin.

Tambe el a laga sa cu na luna di juli ultimo nan a ricibi un carta di SKOA cu ta e fundacion cu tin e mayoria di scolnan bou di dje, caminda nan ta pidi un tiki tempo pa nan por caba di drecha y adapta y wak cu e restructuracion salarial aki ta bon pa tur maestro.

“Pues nan ta sinti cu ainda ta falta cosnan den dje cu nan kier hinca aden”. P’esey sra. Lopez-Tromp no ta wak pa kico y den pura nan tin cu pasa e ley aki, siendo cu nan mes cu ta esunnan cu ta bay haya consecuencianan di e ley aki kier ainda mehore, adapte y dreche. “Kiermen mi no wak pa kico awor e ta un ansha di bida y morto. Di cual e ley aki ta bay wordo trata un dia…”, el a bisa.