Mester paga tino riba decretonan di implementacion
Casi silenciosamente dialuna ultimo Parlamento a trata e proyecto di ley riba ‘verzorgingshuizen’, cu ta encera diferente tipo di instituto di cuido di persona di edad o cu mester di cuido. Por tin diferencia di opinion si en berdad tur articulo di e ley ta un obra di arte, pero cu e ley mes ta ‘long overdue’, cu esey tur persona cu ta traha den e sector aki lo ta di acuerdo. Hopi aña pasa caba a cuminsa un discusion riba e necesidad di un ley asina, despues di varios incidente, di cual cierto di nan a keda denuncia confidencialmente pa personal trahando den e tipo di institucion aki. A cuminsa lanta un cantidad di cas di anciano como empresa priva, cu no tabata mara na ningun tipo di regla o supervision. Realmente ta di lamenta cu mester a transcuri tanto tempo prome cu finalmente awor nos por bay traha riba e implementacion.
E situacion den e casnan di anciano tabatin y tin hopi similaridad cu e situacion den e luganan di cuido pa mucha preescolar, unda tambe a dura añanan prome cu por fin a bin regla y supervision. E ley cu a keda aproba ta un ‘kaderwet’, un ley cu ta duna un cuadro dentro di cual mester stipula e reglanan mas den detaye cu cual e institutonan concerni mester cumpli. Esey ta varia entre nan forma di organisacion formal, te na detayenan tocante espacio compara cu cantidad di cama, garantia di atencion profesional, condicion pa haya y mantene un permiso pa opera, y un proceso di keho pa pashent of su representante.
Ta importante pa ora implementa e ley y e decretonan pa concretisa su implementacion yega na Parlamento, pa tira un bista critico riba esakinan, ya cu ta den e reglanan specifico ey lo determina hopi cos mas den detaye y unda e practica den e casnan concerni ta di gran importancia. Reglanan imponi mester ta exigente pero practico tambe.
Den forma di un “Landsbesluit Houdende Algemene Maatregelen”, lo bin regla pa en todo caso: maneho con pa implementa obhetivo di e ley aki; regla encuanto cantidad y tipo di personal rekeri; accesibilidad y siguridad den e institucion; reglanan encuanto maneho di personal; siguridad encuanto peligro di candela; garantia pa loke ta toca higiena, y prevencion di riesgo encuanto higiena.
Loke si ta keda obheto di critica ta e forma cu e proyecto di ley a keda aproba, y aki sigur ta na su luga pa critica oposicion pa nan actitud. Pa cuminsa no a duna e ley e atencion debido di antemano den publicidad. Legislacion no ta responsabilidad solamente di e ehecutivo y di fraccion cu ta apoya gobierno. Si ta tanto obhecion e partido grandi den oposicion tabatin cu e proyecto di ley, gustosamente tur medio di comunicacion lo a publica nan punto di bista. Nos no a mira esey aparece ningun caminda. Y si acaso nan tin obhecion keto bay despues di e aprobacion, porta lo ta habri pa nan trece e critica ey, pero lo tabata na su luga pa bin cun’e den Parlamento unda e ta pertenece. E fraccion aki tin suficiente conocemento huridico den cas pa por a haci un bon trabao di antemano y bin bon prepara pa trece sugerencia na mesa cu ta sensato y corecto. Si acaso e partido den gobierno rechasa nan sugerencia, djis pasobra nan ta bin di oposicion, e publico bon informa lo sa di husga esey pa nan mes. Y esey sigur si oposicion mes percura pa e informacion ey yega cerca e publico. Manera bisa caba, e medionan na Aruba, salvo algun excepcion, ta habri pa ricibi e informacion aki y publica.
No tur ley tin e mesun origen y obhetivo politico. Mester bisa cu e ley aki a conoce un periodo bastante largo di preparacion traves di un comision amplio, basta tempo prome cu e ministro actual responsabel pa e cartera di Salubridad a asumi e puesto ey. Manera bisa, el a nace di e necesidad di interveni cu supervision den un sector cu realmente tabatin mester di esaki y no awe. Esaki no ta e ley di CAFT, cu a keda introduci despues di preparacion den tur secreto den seno di gobierno, pero tabata a base di un trabao habri, unda hopi trabao preparacion pa loke ta implementacion tambe a tuma luga caba.
Esaki tabata concerni por ehemplo consulta cu e instancianan manera Cuerpo di Bombero, pa loke ta e aspectonan di siguridad, evacuacion di emergencia, etc. E ley aki, banda di ta necesario, no tin pakico di tin seyo berde of geel, pasobra ningun persona den e comision di preparacion a sinta na mesa cu e pensamento cu e lo ta haciendo e trabao aki pa mayor gloria di su partido, si acaso e ta apoya un di nan. Lo nos keda pendiente pa oposicion y fraccion cu ta apoya gobierno, manera bisa, tira un bista critico riba e reglanan adicional cu mester establece e reglanan den detaye, pasobra ey nan opinion por y ta haci un diferencia.
