Bestianan bandona y descuida ta un preocupacion pa hopi hende y un problema irelevante pa otronan. E cantidad di bestianan riba caya hopi di nos ta pasa nan voorbij pero otronan ta trahando duro pa combati e problema aki. Bon Dia Aruba a tuma contacto cu algun di e instancianan envolvi pa sa un tiki mas di nan retonan cu esaki.

Nos a papia cu Andreina Wever kende ta Boardmember di Animal Rights Aruba, y tambe cu Anouk Raaphorst kende ta boardmember di Animal Abuse Report Aruba pa scucha nan opinionnan y kico nan ta sinti falta den comunidad pa e problemanan cu tin di asina hopi bestia maltrata of laga sin doño. Sra. Wever a bisa como cu ARA ta un fundacion asina chikito nan ta pasa den duro pa por tin suficiente luga pa por mantene e bestianan de un luga sano y salvo. Como cu nan no tin un shelter di nan mes y ainda ta purbando di recauda fondo pa por traha uno, nan ta conta cu boluntarionan local cu ta wanta cierto cantidad di bestia pa algun dia of siman, te ora cu otro hende adopta nan.

E cantidad di hende cu ta dispuesto pa haci esaki ta hopi chikito y tambe tin e opcion pa hiba nan veterinario, pero mester paga un suma pa dia. Locual hopi hende no sa ta cu na momento cu bo kier adopta un bestia e ta costa 150 florin y e por zona hopi pero, esaki no ta e gasto completo di locual ARA tin cu paga pa cada bestia por ta cla pa por bay cerca nan doño nobo. Aki ta unda hopi di e fundacionnan aki tin e reto di con nan ta mantene un suma pa por yuda mas bestia cu nan por. Sra. Wever ta bisa cu algun aña atras a yega di haya un suma for di gobierno y e plan lo tabata pa e sigui 3 aña consecutivo, pero segun Sra. Wever e minister cu a yuda cu esaki e tempo ey a bisa cu e no a mira e resultado inmediato y a stop di duna nan e suma cu nan a yega un acuerdo p’e. Sra. Wever ta di opinion cu pa locual ta bestianan sin cas y riba caya no ta un problema cu ta wordo resolvi mesora y cu ta tuma mas tempo pa por mira resultado ya cu e ta un problema basta grandi riba e isla. Pa esaki Sra. Raaphorst ta di opinion cu e ta sinti cu gobierno no tin ningun interes pa duna un man den e parti financiero y gruponan no ta logrando mucho cos.

Educacion pa comunidad
Tanto pa ARA como AARA e enfoke principal ta e educacion. Sra. Wever y Sra. Raaphorts ta di opinion cu aworaki e ta basicamente manera hibando awa lama. Asina ta cu nan ta rescata algun bestia riba caya of esunnan na cas cu no ta wordo bon cuida,  pero e problema ta keda ya cu hendenan no ta educa of responsabel suficiente. E idea ta si pa por enfoca riba e educacion y conscientisacion y pa yega na comunidad pa ta mas responsabel y splica na gruponan di tur edad kico ta e stapnan corecto y opcionnan cu nan tin. Hopi di esaki ta wordo haci riba medianan social, Sra. Raaphorts ta pone potret y videonan di abuso riba e isla, aunke e no ta algo bunita pa wak, e ta spera cu otronan por mira esaki y habri nan wowo pa locual ta pasando y no solamente pa cacho cu pushi so. Sra. Raaphorst ta bisa cu locual falta tambe ta mas proyecto di sterilisacion y tambe opcionnan menos costoso pa haci esaki, pasobra maske cu hendenan sa cu esaki ta e solucion pa menos bestia riba caya, hopi ta esunnan cu tin mas cu 2 cacho na cas y por ta no por cubri e gastonan ey. Aña pasa tabata tin uno cual bo por a paga 100 florin pa sterilisa bo cacho, hopi hende ta di opinion cu e prijs lo a baha pero no tabata asina. Locual a pasa ta cu nan a haya sponsor for di un persona cu por a cubri e otro mita pa por paga e veterinarionan e prijs completo cu hopi hende no por paga.

Leynan pa proteha bestia
Maltrato di bestia ta castigabel pa ley, segun leynan cu ta proteha bestia. Pero locual cu falta ta e peso riba dje. Sra. Wever ta bisa cu en berdad polis ta bay na e sitio cu a wordo reporta, pero e siguiente stapnan manera, si e keho wordo entrega, cu e ta bay ministerio publico esey no ta tumando luga. Aparte di esey e landsverdordering cu ta specificamente pa cacho, tampoco ta trahando manera debe ser. Durante e proceso di adaptacion, ARA tabata involucra den parlamento treciendo hopi conseho dilanti di kico nan ta pensa cu falta y comparacion cu otro paisnan, pero lastimamente ni un di e consehonan a wordo scucha. Tanto como Sra. Wever y Sra. Raaphorst ta bisa cu libertad, autoridadnan tin tur derecho pero ni maske nan yega na un cas unda tin bestia maltrata of riba caya, nan no por bay cu e bestianan for di e doño pasobra no tin un luga cu por pone nan.