Manera anuncia anteriormente pa ministro encarga cu Finanzas, Xiomara Maduro, e proyecto di ley pa cambia e ley di BBO, pa inclui e cobro di BBO na momento di importacion di bienes, a yega parlamento ayera.
For di e propuesta aki por conclui cu e imposicion di e impuesto na momento di importacion ta bay conta pa tanto BBO, BAVP (destina na proyectonan ‘PPP’) y BAZV, e ultimo aki destina na cubri gasto di AZV. Tambe e proyecto di ley ta contene varios adaptacion den otro ley cu tin nan relacion cu e cambionan den e ley di BBO.
Derecho di deduccion.
Bao cierto condicion un empresario por haya deduccion, den e sentido cu na momento di paga e suma cu e debe a base di su benta di luna, e por deduci e suma cu el a paga na momento di importacion pa e mesun periodo ey. Pa por haya e areglo aki e empresario mester cumpli cu loke ta stipula den articulo 48 , inciso cuatro y cinco, di Algemene landsverordening Belastingen (AB 2004 no. 10). E articulo aki ta defini esnan cu tin obligacion di hiba un administracion y e rekisitonan pa tal administracion. Esaki tambe pa esnan cu ta usa un sistema di caha y e rekisitonan specifico pa e cash slip cu ta entrega na e cliente.
E ley no ta menciona ningun limitacion pa loke ta e tipo di empresa, di persona natural o di persona legal. Esaki contrario na e comentarionan previo cu lo tabata trata di un deduccion solamente pa e sector di mayorista (wholesaler). Esaki ta implica cu tur empresario cu ta importa mercancia ta paga BBO/BAVP/BAZV (total 6%) na momento di importacion, y por reclama deduccion na momento di declara y paga mensualmente su BBO/BAZV/BAVP riba su benta.
Banda di e cambionan aki ta cambia e reparticion di impuesto riba acomodacion turistico, unda gobierno envez di 20% di e entrada aki, lo haya 35%, ATA e resto kitando fondo pa Tourist Enhancement Fund. Desde 2020 ATA lo haya anto 65% di e recursonan aki.
Gobierno a probecha e cambio di ley aki tambe pa trece cambio den structura di impuesto riba empresa. Asina a baha e tarifa pa winstbelasting, y lo kita e areglo conoci como IPC cu tabata duna facilidad na un cantidad hopi reduci di compania (grandi) pa paga considerablemente menos winstbelasting. Den un siguiente edicion mas tocante e cambionan acompañante aki.
Segun anuncio di gobierno den su propuesta di ley di presupuesto 2020 lo ta trata di un suma di alrededor di Afl. 35 miyon, riba base anual, cu ta spera di colecta a traves di e cambio di ley aki. Como cu e ley lo no drenta na vigor prome cu 1 di april 2020, entrada pa e aña aki ta calcula na Afl. 26,3 miyon.
