Banco Central y e Financial Intelligence Unit lo tin autoridad pa sa ken exactamente ta haci negoshi na Aruba

Aruba ta cumpli hopi bon cu rekisitonan di Financial Action Taskforce, FATF y ampliacion di e Ley contra labamento di placa y financiamento di terorismo, LWTF, pa identifica ken ta e Ultimate Beneficiary Owner, UBO ta muestra di tal. E decreto nacional pa permiti articulo 51 di e LWTF cu a keda aproba ayera den Parlamento.

E decreto nacional aki ta duna Camara di Comercio e autoridad pa inclui den su registro ken ta e UBO, esta e Ultimate Beneficiary Owner. UBO e doño of doñonan di companianan y/of esnan cu tin e decision final den structuranan huridico cu ta inscribi na Camara di Comercio. E registro ta maneha pa Camara di Comercio, pero e entidad responsabel pa cumplimento cu e ley ta Minister pa Asuntonan Economico.

E reunion tabata uno relativamente tecnico, cu poco debate, aunke cu tabatin pregunta di dr. Ryçond Santos do Nascimento di AVP, Setty Yarzagaray di MEP y Raymond Kamperveen di Raiz na Minister pa Asuntonan Economico, mr. Geoffrey Wever.

E Minister a splica cu Aruba como pais cu ta opera den comunidad internacional a compromete su mes pa cumpli cu recomendacionnan di FATF. Como tal mester hinca e recomendacionnan den legislacion local. E LWTF ta un di nan.

“E cambio den e ley ta trata registracion di e UBO cu na final ta doño di structura di entidad huridico. Hopi biaha esnan cu ta purba abusa e sistema ta den negoshi di laba placa of financia terorismo y ta usa e structuranan cu ta dificil pa compronde, ta purba sconde tras di structura huridico. E leynan aki ta pa expone nan. Na e momentonan aki, e UBO no ta registra den un registro publico, y recomendacion 24 y 25 di FATF ta bisa cu esaki ta necesario. Pa e motibo ey a scoge pa Camara di Comercio inclui e registro di e UBO. E ley ta papia di empresanan, companianan, trusts, empresanan y personanan huridico,” Minister Wever a ilustra.

Ley Registro Empresa

Ademas di e articulo 51 di e LWTF, tambe mester adapta e ley di Registro di Empresa, unda ta ilustra exactamente ta e persona of personanan cu tin e poder pa tuma decision. E ley ta papia di diferente categoria, pasobra por tin cinco compania cu cada un cu su registro di accionnan y na final ta yega na e compania di e holding, esta e compania cu ta doño di tur. Varios hende por ta doño di e structura. Di otro banda, tin structuranan mas complica, unda ta traha cu asina yama ‘stroman’ (persona cu ta paga pa fungi como doño) y otro structura, cu tin como meta pa sconde ken realmente ta e doño kende tin e control efectivo y cu tin e poder pa tuma decision.

E ley pues ta permiti pa wak ken tin e control final.

Privacidad

Pero, mester a trece cambio den e ley, pa crea condicionnan adicional, por ehempel ken por haya acceso na e registro. “No ta ken cu ta por bay pidi informacion pasobra tin derecho riba privacidad,” Minister Wever a bisa, referiendo specifico na un pregunta di Parlamentario Santos do Nascimento. “Raad van Advies tambe a señala esey, y pa e motibo ey a cambia e concepto.”

E ley ta permiti e Financial Intelligence Unit, antes MOT y Banco Central di Aruba tin acceso na e registro pa por sa ken ta e doño final di e compania. A base di un decreto nacional cu medida general, lbham lo apunta cua otro tipo di instancia oficial cu por haya bista riba e registro. E Minister a bisa cu instancianan ta inclui Ministerio Publico, e Autoridad di Wega di Placa, Cuerpo Policial y otronan encarga cu investigacion penal. “E decreto nacional no t’ey ainda. Sin tin necesidad pa amplia e instancianan cu por yega na e registro publico ey, anto mester bin cu e lbham cu tambe ta rekeri conseho di Raad van Advies. Pues no ta sin mas por amplia, sino mester cana procedura formal,” e Minister a sigura.

Dunado di servicio

E pensamento tras di e ley aki ta pa tur dunado di servicio cumpli cu e rekisito di ‘know your client,’ y ta parti di locual ta conoci den e mundo financiero-economico, cu ta due diligence. Esaki ta implica cu ta investiga tur detaye pa percura cu e compania ta cumpli cu rekisitonan financiero y legal. Pa tal motibo mes, e dunado di servicio, cu por ta un oficina di notario, abogado, accountant, fiscalista por haya bista den e registro. Pero e informacion cu por haya ta limita, sigur compara cu locual Banco Central di Aruba y FIU.

E Minister a bisa cu e limitacion aki ta netamente pa proteha privacidad di companianan. E informacion cu e dunado di servicio por haya acceso na dje ta e nomber, aña y luna di nacemento, e pais di nacionalidad, y tambe e interes y porcentahe di accion den entidad. Pero, unicamente por yega na e datonan aki ora cu mester haci e ‘due diligence,’ pa nan por identifica nan cliente. Como tal no tur dunado di servicio por haya e acceso limita aki. Pues no tur dienstverlener por haya e acceso limita aki tampoco.

Den cuadro di privacidad, Camara di Comercio mester registra ken ta pidi e informacion. Por ehempel, si un persona huridico of natural puntra ken ta e UBO, Camara di Comercio mester registra esaki, identifica e persona y tin e obligacion, den caso cu e UBO puntra pa bisa cuanto biaha a pidi pa e informacion. E ley no ta bisa cu Camara di Comercio mester bisa ken ta puntra pa e UBO sino cuanto biaha a pidi pa e dato aki. “Esnan exclui di e obligacion FIU y Banco Central di Aruba, Pues e ora e UBO no ta haya informacion.”

Ademas, e ley ta inclui un obligacion di secresia. No por comparti e dato aki cu terceronan. Violacion di e secresia aki ta mara na un castigo penal. “Pues e tin su proteccion huridico.”

Supervision

Secretario di Camara di Comercio ta responsabel pa mantene e registro. E por pidi informacion y hasta por haci uso di Cuerpo Policial pa haya acceso na e datonan cu mester pa e registro. Pero implementacion di e ley mes ta den man di Ministerio di Asuntonan Economico. “E Minister por impone boet, e tin e prerogativo pa obliga pa cumpli a base di boet,” mr. Wever a sigui splica, agregando cu e maximo ta 100 mil florin. E proceduranan pa implementacion mester keda formula ainda, pero en todo caso, e Minister tin e responsabilidad pa informa e personanan envolvi. “ Y manera cu impone e boet, mester paga. E persona por apela y si no ta den posicion pa paga boet, mester pidi Corte pa un areglo. Na momento cu huez bisa cu e boet no ta corecto, Gobierno mester duna e placa bek, mas interes.”

E otro responsabilidad di Gobierno ta e costo pa e registro. Camara di Comercio ta encarga cu n’e, pero Ministerio pa Asuntonan Economico tin cu carga cu e gastonan, incluso e creacion di e portal pa e registro cu mester ta hopi sigur y bon protegi. A aloca 1 miyon florin pa 2022 pa creacion di e registro y na 2023 tin otro 335 mil florin pa caba cu e trabao.

Locual no ta sosode awor ta e compensacion na Camara di Comercio cu mester ta den relacion cu e capital den e empresa registra. Motibo ta cu no solamente mester inclui e director, of directornan, sino tambe e cantidad di empleadonan y ta a base di e cantidad aki mester contribui na Camara di Comercio pa e registro. Wever a bisa cu e mes ta haya cu e aspecto di cantidad di empleado ta crea mas “red tape, cu ta nifica cu tur compania mester haci otro ehercicio pa cumpli , y no tabatin mi preferencia. Na Aruba, e cantidad di director no ta mara na e grandura di e compania. Mi a hay’e poco prematuro sin cu e ta bon discuti cu e sector. P’esey a elimina e articulo 15 pa no hisa e gasto pa haci negoshi. Hopi biaha ta ley ta hisa gasto y awor a purba limita e aumento di gasto,” Minister Wever a splica. “Berdad ora ta pidi compania registra ken ta UBO, e ta bay trece un peso administrativo y e ta costa tempo y placa. E ta un trabao grandi pa Camara di Comercio. Pues e tin un consecuencia financiero considerable.”

Unicamente despues di tene combersacionnan cu e sector y tambe cu Camara di Comercio lo dicidi riba e modernisacion di e ley di registro di negoshi y esey ta e momento pa determina e nivel di compensacion.

Finalmente, Minister Wever a enfatisa cu e ley cu a pasa ayera, ta esencial pa Aruba por keda participa den e mundo bancario internacional, pasobra ta cumpli cu un di e rekisitonan di FATF pa banconan internacional por sigui traha cu e institutonan bancario na Aruba.