(AP) – Studiantenan di Brazil a bolbe klas e siman aki cu un tarea nobo: keda leu for di nan smartphone cu implementacion di ley nobo cu ta restringi nan uso den scol.
Presidente Luiz Inacio Lula da Silva a firma un proposicion den januari unda ta limita e acceso na smartphone den scol, di acuerdo cu un moda mira na Merca y Europa. E ta aplica na tanto scolnan publico como priva y tanto den klas como pafo di esaki.
Telefon te ainda ta permiti pa propositonan di educacion, cu permiso di e docente y ora cu ta necesario pa e studiante su accesibilidad y salud. Scolnan por crea nan propio guia, manera si e studiantenan por keda cu e smartphone den cas of nan mester hinca esaki den locker of basket designa.
Prome cu e ley federal, mayoria di Brazil su 26 estado, incluyendo Rio de Janeiro, Maranhao y Goias, a aplica algun restriccion caba contra uso di telefon na scol. Desde aña 2023, casi 2 tercer parti di scolnan na Brazil tabatin limitacionnan, cu 28% prohibiendo esaki completamente, segun un encuesta aña pasa di Brazilian Internet Steering Committee.
Sinembargo reglanan ta varia entre estado y scolnan cu autoridad y administradornan ta lucha pa implementa esaki.
Esaki por a contribui na sosten pa legislacion federal, ambos di aliado di Lula y derechista Jair Bolsonaro. Un encuesta publica den october pa Datafolha a bisa cu casi 2 tercer parti di e participantenan kier a prohibi uso di smartphone di muchanan y hobennan na scol Mas di 3 kwart a bisa cu e dispositivonan aki ta causa mas daño cu bon na muchanan.
Porto Seguro, un scol priva di casi 150 aña na Sao Paulo, a prohibi smartphone den klas aña pasa y a encurasha e hobennan desconecta completamente por lo menos 1 biaha pa siman. E aña aki, el a expande e prohibicion pa inclui den gang tambe, rekeriendo e studiantenan mantene nan telefon den locker henter e dia escolar, incluyendo den pauze.
“Studiantenan tabatin problema pa concentra,” cabesante di e scol Meire Nocito a bisa den un entrevista. “Tabatin tambe e problema di isolacion social. Varios studiante cu tabata usa e tecnologia excesivamente tabata isola nan mes durante pauze, interactuando solamente via rednan social.”
“Prohibi uso di celular a yuda crea un espacio pa interaccion social, fomentando relacionnan y siñando e studiantenan nabega conflicto, cual ta un parti natural di interaccion humano. E ta algo hopi positivo,” el a agrega.
Ministerio di educacion di Brazil a bisa den declaracion dialuna cu e restriccion tin meta di proteha e studiantenan su salud mental y fisico mientras cu ta promove e uso mas racional di tecnologia.
Den mei, Fundacao Getulio Vargas, un think-tank lider y universidad, a bisa cu Brazil tin mas smartphone cu hende, cu 258 miyon dispositivo pa un poblacion di 203 miyon Brasilero. Investigadornan di mercado local a bisa aña pasa cu e Brasileronan a pasa 9 ora y 13 minuut pa dia riba pantaya, cual ta entre e averahe mas halto di uso na mundo.
Institucionnan, gobierno, mayornan y otronan tin varios aña ta asocia uso di smartphone den muchanan cu bullying, ideacion di suicidio, ansiedad y perdida di concentracion necesario pa por siña. China a tuma movida aña pasa pa limita muchanan su uso di smartphone, mientras cu Francia tin un prohibicion di smartphone den scol pa muchanan di 6 pa 15 aña.
Prohibicion di celular a gana popularidad na Merca, unda 8 estado a aproba leynan of politicanan cu ta prohibi of restringi uso di celular pa purba combati e acceso na telefon y minimalisa e distraccion den klas.
Un aumento di mayor preocupa pa evidencia cu uso di smartphone entre hobennan ta pone nan seguridad y salud mental den peliger a ser mira na Europa.
Un rapport publica den september pa ONU su Educational, Cientific and Cultural Organization (UNESCO) a bisa cu 1 den cada 4 pais ya caba a restringi e uso di e dispositivonan aki na scol.
E restriccion aki tambe a yuda “inclui hende cu no tabatin hopi amistad y tabata usa nan telefon pa sconde di crea amistadnan nobo of evita ta presente,” el a bisa den un entrevista. “Awo, nan no tin e opcion aki mas. E hendenan aki a cuminsa hunga wega di mesa of lesa buki.”
