Den un ambiente combativo di parti di e fraccionnan cu ta sostene gobierno di coalicion, a tuma luga e tratamento pa cambio di proyecto di ley di supervision financiero – Landsverordening Aruba financieel toezicht (LAft) – cu a conoce un retraso considerabel. E cambionan palabra cu Hulanda lo mester a keda cla prome cu fin di 2018, pero finalmente ayera e ley tabata den parlamento.

Atencion tabata dirigi riba e cambionan cu principalmente fraccion di partido MEP a anuncia di trece dilanti den amienda, pa atende cierto problema den e ley actual cu merece mehoracion, segun nan opinion. Manera anuncia di antemano, sin cu e texto final tabata conoci, lo a trata di trece mehoracion den e puntonan señala pa Raad van Advies den nan conseho original na ocasion di introduccion di e ley na 2015, y ripiti den nan conseho riba e actual proyecto di modificacion. Den e ultimo conseho, RvA ta menciona tres punto concreto, cu ta e problema general di ‘teritorialidad’: ta duna autoridad y obligacion (tarea) na organonan cu no ta pertenece na Aruba, di Hulanda o di Reino, loke pa principio no por haci den un ordenanza local. RvA ta bisa cu esakinan mester ta regla den un ley di Reino. Sinembargo, no tabata parti di e debate, di ningun di dos banda, cu lo ta desea di propone pa regla esaki tambe den un areglo legal na nivel di Reino.

Igualmente pa loke ta e areglo di disputa (geschillenregeling) cu e ley ta contempla, RvA ta haya cu esaki ta algo cu mester regla den legislacion na nivel di Reino. Pa loke ta e limitacion di e derecho di stipula presupuesto (budgetrecht), RvA a conseha pa laga e evaluacion di banda di CAft di e presupuesto aproba tuma luga prome cu Gobernador firma esaki. E bentaha lo ta, segun RvA, cu e ora Gobernador por añadi opinion di CAft na su evaluacion prome cu e firma. Asina por evita cu Gobernador ta den un situacion fastioso, cu prome e ta firma un ley aproba pa parlamento, pa despues haya sa cu CAft y Conseho di Ministro di Reino no ta di acuerdo, y cu Gobernador ta haya instruccion di Conseho di Ministro di Reino pa adapta e ley, y manda esaki parlamento atrobe.

Otro tema tabata e cambio cu ta permiti pa ex-politico o ex-mandatario bira miembro di e organismo CAft. Esaki a duna bastante discusion dentro di e partido geel, ya cu na nivel di gobierno a bay di acuerdo cu Hulanda pa haci esaki posibel, acomodando e ex-mandatarionan Hulandes, pero, manera prome ministro a argumenta den prome tanda, esaki ta brinda e posibilidad tambe pa ministro o politiconan cu experiencia bira miembro pa Aruba.

Finalmente e amienda tan espera a bira conoci, den segunda tanda, conteniendo como 40 cambio den e ley actual. Entre otro, a introduci un ‘considerando’ nobo, den cual a elimina e consideracionnan cu tabatin di haci cu e acuerdo pa duna (temporalmente), a base di articulo 52 di Statuut, cierto facultadnan na gobierno di Reino, pa por efectua e supervision financiero di Reino. Den e demas cambionan den e ley, a sistematicamente elimina tur referencia na gobierno di Reino y parlamento Hulandes. Cu esaki, gobierno di Reino no ta un factor mas den e ley, unda CAft si lo keda existi, tambe den su forma actual, es decir cu participacion di Hulanda, pero lo raporta solamente na gobierno y Staten di Aruba.

Remarcabel ta cu a duna oposicion solamente algo mas cu 20 minuut pa studia e amienda di 40 cambio y di 6 pagina, cu nan no a mira prome cu e momento ey den segunda tanda.

Den e intervencion di tanto prome ministro y ministro encarga cu finanzas, a recorda e miembronan di parlamento cu nan tin cierto compromisonan cu gobierno Hulandes, e protocol di november 2018; pero di otro banda no a desaproba, y hasta a aplaudi, e cambionan cu e parlamentarionan a trece aden. Manera prome ministro a bisa den segunda tanda, nan (gobierno) tambe tabatin pensa di bin cu varios cambio den e direccion tuma, pero na e momento aki kier a laga e cambionan limita na e acuerdonan cu Hulanda.

Cu e cambionan tambe CAft no ta duna conseho mas riba e presupuesto aproba, sino solamente riba e proyecto di ley di presupuesto. Despues di aprobacion di e ley di presupuesto no tin anto e proceso di evaluacion di CAft, sigui pa analisis y consideracion den Conseho di Ministro di Reino, cu por duna instruccion pa cambia e ley. Asina ta yega un fin na intervencion di Reino den e supervision financiero, por lo menos segun filosofia di esnan cu a tuma e iniciativa aki.

Cu e cambionan introduci, e ley di supervision a bira un ley netamente local, cu un aspecto di Reino ainda aden. Esey ta cu ta reconoce existencia y funcionamento di e colegio di supervision, pero sin vinculo cu gobierno di Reino.

Nota di redaccion:

E cambio hopi extenso aki ta yama diferente pregunta. Manera: kico ta bay ta e reaccion di gobierno Hulandes, cu a acorda e ley aki cu gobierno di Aruba, cualkier cu ta sinta ey, mientras awor practicamente a elimina e supervision di Reino, y a cambia esaki pa un supervision di parlamento di Aruba. Esaki ta habri e posibilidad pa gobierno di Hulanda/Reino pasa pa hinca e supervision di Reino den un ley di Reino? No mester lubida cu Raad van Advies den su conseho a mustra bon cla cu e problema y contradiccionnan cu nan ta mira den e ley manera e tabata, ta asuntonan cu mester regla na nivel di Reino, a traves di un ley di Reino o un Algemene Maatregel van Rijksbestuur. Tambe ta keda e aspecto cu gobierno ehecutivo ta mara na e protocol di november 2018.

Diadomingo awor, 9 di juni, pa 4or di atardi den Cas di Cultura, alumnonan di Scol di Musica Rufo Wever, bou di guia di e docentenan, lo brinda amantenan di bon musica nan concierto di fin di aña escolar.

Nan lo presenta un programa varia den estilo y combinacion di instrumentonan pa cera e aña escolar 2018/2019. Nan lo interpreta cancionnan crioyo, regional y tambe internacional.

E alumnonan lo demostra nan habilidad riba diferente instrumento, entre otro instrumentonan Orff, piano, baho, guitara, cuarta, drums, percusion, fio, trompet y tambe canto. Lo presenta den gruponan chikito, grandi y tambe como solista.

Carchi ta obtenibel cerca administracion di Scol di Musica Rufo Wever, na Cas di Cultura piso ariba, y na porta dia di e concierto.