Ley encuanto zona economico exclusivo no ta regla ainda

Mas di un aña pasa, na juni 2016 den e editorial aki, nos a reacciona riba e noticia di un parlamentario di nos pais, cu a tende na Hulanda cu e derechonan di e zona economico exclusivo ainda ta pertenece na Reino. Nos ta un aña y mey mas leu y atrobe ta trece e asunto aki na nos atencion. Tur hende cu ta sigui e asuntonan cu ta bin dilanti den nos parlamento sa cu den e periodo ey no a trata nada tocante e asunto aki. Kico realmente ta pasando aki?

Algo di historia prome. Varios aña pasa, Reino Hulandes a ratifica e tratado di Nacion Uni encuanto derecho maritimo. E tratado aki di 10 di december 1982, United Nations Convention on the Law of the Sea (Montego Bay, Jamaica) ta regla asunto di derecho encuanto zona exclusivo economico (200 miya), derecho di pesca, recurso den awa y den subsuelo di e teritorio (gas, petroleo, e.o.) y varios asunto mas. Esaki ta significa tambe cu e derecho y debernan cu ta surgi di e tratado aki ta cay riba esun cu a ratifica, tanten e no ta regla di otro manera. Y e otro manera ta necesario pa e teritorionan di Reino den Caribe mes asumi responsabilidad pa e parti di lama cu ta cay pa nan pais.

Asina nos coleganan di e tempo ey Antias Hulandes na maart 2007 a percura pa un ley, e Landsverordening Maritiem Beheer, cu ta regla pa nan teritorio e derecho y debernan di e tratado. Cu esaki en bes di Reino, e teritorio specifico a bira doño di e derechonan bao di e tratado, pero a bira responsabel tambe pa reportahe na Nacion Uni encuanto e obligacionnan. Despues, tempo cu a disolve Antias y a crea e paisnan Curaçao, St. Maarten y e islanan BES, a percura pa e debido documentacion encuanto e separacion di e diferente teritorionan marino.

Tambe Reino Hulandes a regla cu nos bisiña, Republica di Venezuela, e asunto di e delineacion di e awanan teritorial entre e dos teritorionan. Specialmente entre costa di Venezuela y Aruba no tin 12 miya cada banda y mester a regla unda e separacion di awa teritorial ta core. Den e acuerdo di 31 di maart 1978 esaki a keda completa. E documento ta conoci como Grensverdrag entre Reino Hulandes y Republica di Venezuela.

Tur cos a keda aparentemente bon regla tanten ta otro tabata responsabel pa haci esey. Despues, ora cu Aruba mes mester a regla cos, nada a sucede mas. A regla si cu a bin un ley riba exploracion di gas y petroleo, pero e asunto di e zona economico exclusivo nunca a wordo regla. Den e caso aki ta surgi e pregunta pakico e asunto aki a wordo tira un banda, mientras cu el a bira urgente, ya cu e exploracion pa gas di Repsol por bay tuma luga den e zona aki. Pakico no a haci e trabao aki añanan pasa caba? Y kico ta loke mester haci concretamente? Nos tur por bay riba internet anto download e ordenanza di Antias menciona, y adapta esaki na e caso di Aruba. Manera den caso di otro ley cu nos a adopta for di legislacion Antiano, e cambionan ta minimo. Di tur manera, semper nos tin e obligacion di mantene nos leynan den concordancia cu Reino y e otro teritorionan den Caribe, asina ta cu no ta un trabao di otro mundo.

Mester considera tambe cu e asunto aki no tin nada di controversia politico cu ne. Ta un asunto cu ta toca nos como Aruba completo y si nos no ta kiboca, tin suficiente hurista experimenta pa atende e asunto aki. Pakico na Antias, entre tur pleito y conflicto entre politico, pasobra den esey nan no ta nada miho cu esunnan di nos, nan tin e merito cu nan ta regla e asuntonan aki, mientras nan no tin sikiera e situacion di Aruba unda un compania di renombre ta dispuesto pa inverti den exploracion.

Of por ta cu tabatin un otro motibo cu te awe no a regla e asunto aki? Durante ocho aña en todo caso nos a topa cu un gobierno cu tabata hermetico riba e asunto aki. Awor cu nos a haya un cambio di gobierno, por ta cu awor nan por caba di regla e asunto aki? Ademas, nos no mester hacie solamente cu bista riba posibel recurso den subsuelo, manera gas y petroleo. No ta bira tempo pa nos cuminsa uza e teritorio maritimo aki pa loke ta e recursonan di pesca, dunando un boost na e sector aki cu semper a wordo contempla como algo cu ta haci cu boto chikito, lagando na otronan pa ocupa nan mes cu e actividad economico aki na nivel mas profesional y industrial.

Un cos si, ban regla di biaha bon kico ta nos debernan ora nos tuma over e responsabilidad pa e tratado aki. Por ta cu ta aki tin un problema? Aunke nos no ta di opinion cu e responsabilidadnan por ta asina enorme, nos gustosamente ta laga esaki na e huristanan di gobierno pa splica mas den detaye. Nos ta keda pendiente.