Papa Francisco a bin cu ley nobo, cu ta exigi cu tur sacerdote y monja catolico di henter mundo denuncia abuso sexual, y tambe denuncia intentonan di nan superior pa tapa e suceso na autoridad halto di iglesia.
E ley ta duna proteccion na cualkier informante haciendo un reporte, y ta rekeri tur diocesis pa tin un sistema pa ricibi kehonan confidencialmente. Y ademas ta delinea proceduranan interno pa conduci investigacionnan preliminar ora e persona acusa ta un obispo, cardenal of superior religioso.
Ta e esfuerso mas recien di Francisco pa responde na e scandal global di abuso sexual y encubrimento cu a devasta e credibilidad di e herarkia Catolico y su propio papado. Y e ta duna un marco legal nobo pa obisponan Mericano, mientras nan ta prepara pa adopta medidanan di responsabilidad proximo luna, pa responde na e scandal eynan.
E decreto ta rekeri e 415,000 pastoor y 660,000 monja rond mundo pa bisa autoridadnan di iglesia ora nan haya sa of ‘tin motibo bon funda pa kere’ cu un clergo of monja a comete abuso sexual di un menor, mal conducta sexual cu un adulto, posesion di pornografia infantil – of cu un superior a cubri algun di e crimennan aki.
E ley no ta exigi nan raporta esaki na polis, manera victima ta exigi. Vaticano pa hopi tempo a argumenta cu diferente sistema legal ta haci un ley di reporte universal imposibel, y cu impone un lo por pone iglesia den peliger na luganan unda Catoliconan ta un minoria persigui.
Si esaki wordo implementa, Vaticano por tin un ‘avalancha’ di informe tocante abuso y cubrimiento di abuso den a proximo añanan. Awo tambe nan por informa caso antiguo di delito sexual.
Sinembargo, e ley nobo ta rekeri cu oficina di Vaticano ta comparti informacion durante henter e proceso. E ley lo drenta na vigor dia 1 di juni pa un periodo inicial di 3 aña. E sistema di informe mester ta estableci na embahada local di Vaticano prome cu 1 juni 2020.
