Ademas no ta atende mundo digital

 A surgi algun conmocion tocante e carta cu departamento di Telecomunicacion a manda pa e emisoranan di radio y television, encuanto programa di caracter politico durante campaña electoral. E leynan existente ta concerni solamente e medionan radio y television y no e sector di medio digital. Esaki caba ta un omision grandi cu den e añanan reciente mester a atende. Sin embargo, aki nos tin otro muestra di e falta di legislacion nobo of adapta. Esaki ta un problema cronico y general cu mester di atencion pa hopi aña caba. En todo caso aki e asunto di radio y television dentro di e legislacion actual.

Pa cuminsa, kico e leynan ta bisa? Pa loke ta radio, ta existi legislacion limitativo cu ta contempla solamente espacio na radio pa partidonan politico durante e periodo entre e dia di registra lista di candidato (4 di augustus) y te dos dia prome cu e dia di eleccion (22 di september). E ley ta contempla un prohibicion general pa partido politico pone programa o propaganda politico na radio fuera di e periodo menciona. Cada emisora tin posibilidad di acomoda cada siman un solo partido pa un espacio di maximo 30 minuut, si ta un partido cu no tin representacion den parlamento. Esnan cu tin representacion tin derecho riba 15 minuut so. Den ambos caso di partido politico, e emisora por acepta un maximo di 25 mensahe politico pa dia, di cada partido.

Un emisora di television por duna cada siman cualkier partido politico registra un maximo di 30 minuut di transmision, pero un so pa siman. Por acepta 100 mensahe di propaganda pa luna, cu un maximo di cinco mensahe pa dia.

Awor, e limitacionnan aki ta cuadra cu loke Constitucion ta bisa? Constitucion (Articulo I-12) ta dicta cu: “Pa medio di ley (landsverordening) por somete transmision di radio o television na permiso, na interes di uzo responsabel di ‘ether’ o na interes di pluriformidad di emision. No tin supervision previo riba contenido di transmision di radio o television.”   Esaki ta implica cu por tin regulacion pa radio y television, pero cu esaki por ta solamente den cuadro di uzo responsabel di espacio radial o di television, o pa garantisa ‘pluriformidad’ entre e interesadonan, den e caso aki esnan participando na e contienda electoral. E ley actual, mas exacto e decreto (landsbesluit) deriva di esaki, no ta responde na e realidad di awendia, y no ta garantisa cu tur partido por haya espacio igualmente. Aki e no ta cuadra cu e sentido di Constitucion, di garantisa libertad di expresion por igual.

Como agravante den henter e asunto aki nos ta haya e situacion di aña 2017, unda cu radio y television tin competencia fuerte di e medionan digitalisa, pa cual no tin ningun tipo di legislacion. Partidonan politico ta liber pa organisa nan propio website, nan pagina riba Facebook, Twitter o Instagram, por ehemplo, sin cu tin restriccion algun riba esaki. Na luga di bay presenta un biaha den e 7 siman disponibel na un radio o emisora di television, bo entrevista haci na bo gusto ta 24/7 pa tur hende rond mundo mira. Pakico asina estricto cu radio y television si e limitacion ta perde relevancia compara cu e otro posibilidadnan?

Logicamente lo tin yamado pa bin cu mas supervision riba loke nos ciudadanonan ta pone riba internet. Aki nos ta toca materia masha sensitivo, unda mester ta sumamente cuidadoso pa no afecta libertad di expresion di cada ken. En todo caso mester analisa prome si nos tin suficiente instrumento hudicial pa actua den caso di material demasiado ofensivo, manera den caso di insulto, menasa, etc. Di ningun manera, como prensa liber, lo nos ta na vanguardia di boga pa medida legislativo cu tin como consecuencia un limitacion di libertad di expresion.

Kico anto lo mester a sucede caba, den e cuatro añanan despues di ultimo eleccion? E departamento concerni por lo menos mester a haci su trabao pa update e ley bieu aki, cu obviamente no ta responde na e exigencianan di awe.

Di otro banda, ta existi duda serio si e departamento, si acaso nan lo desea di hiba un control estricto riba radio y television, ta dispone di e ekipo electronico pa haci esaki. Na 2013 esey no tabata e caso. Sigur mirando e cantidad di radio emisora, ta un tarea casi imposibel pa bay controla. Loke en todo caso por spera di e departamento ta cu nan, riba denuncia di  incidente di expresionnan haci na radio o television, mester por actua contundentemente. Y como e decreto actual no por acomoda e realidad actual, di tanto partido politico, e departamento lo ta obliga di mustra cierto flexibilidad y sigur no bay uza su supervision na un manera selectivo y arbitrario/partidario.

Kico cumplimento estricto cu e leynan aki ta implica? Cu den e simannan entre dia di registra lista te dos dia prome cu eleccion, no tin ni tempo pa cada emisora duna cada partido, si ta 9 o 10 nan ta, un oportunidad pa presenta nan mes, pasobra ta 7 siman so ta bay tin. Aki caba ta viola e principio di oportunidad igual pa tur.