Si e proyecto di ley ‘Ladsverordening Toezicht Kansspelen’ no ta bin cla na tempo, lo por tin consecuencia pa nos pais.
Encuanto si tin un ultimatum di parti di FATF (Financial Action Task Force) pa cumpli cu nan recomendacion, Minister di Husticia, Siguridad y Integracion, Andin Bikker a expresa cu gobierno tin su autonomia a base di acuerdo cu nos tin como pais. Pero e riesgo cu pais Aruba lo por core ta cu eventualmente nos lo por haya un evaluacion menos bon.
“Esey por tin consecuencianan cu bo no ta desea pa bo economia”, asina e mandatario a bisa.
Sinembargo, Bikker a declara na Bon Dia Aruba cu gobierno mester bin cla cune na tempo, ya cu pa september 2020 tin un audit a base di e recomendacionnan di FATF. E recomendacionnan aki ta dirigi pa preveni y combati mal uzo di e sistema financiero pa sconde procedencia di fondonan dudoso of financia actividad ilicito.
Actualmente gobierno tin den nan disposicion un grupo sumamente grandi integra pa personal di diferente departamento, entre nan Banco Central y departamento Huridico, cu ta dunando asistencia na gobierno riba e ley aki. Di e forma aki gobierno kier garantisa cu pais Aruba ta miho prepara posibel pa e evaluacion di aña venidero.
Den cuadro di esaki e ta convenci cu pais Aruba ta bay cumpli cu e compromiso pa tin e ley cu ta regarda weganan monetario manera casino y loteria na vigor, y tambe funcionando optimalmente prome cu evaluacion di september 2020.
E ta haya cu lo ta ideal pa e proyecto di ley aki ser aproba no mas laat cu cuminsamento di 2020 pa e por drenta na vigor, y tambe pa e ley por ta efectivo. Ya cu ora e audit bin na september 2020, e ley aki lo ta den pleno funcionamento y optimal.
Pa tal motibo nan ta haciendo nan maximo esfuerso, pero gran parti di dje ta den man di parlamento pa nan por trat’e prome cu fin di aña. Por bira tambe na cuminsamento di 2020, pero esaki ta keda na discrecion di Parlamento.
E mandatario a sigura cu pronto y seguramente prome cu september 2020, e ley aki cu tin di haci cu introduccion di supervision moderno pa industria di weganan monetario, manera casino y loteria, no solamente mester a wordo aproba. Aworaki nan ta bezig cu nota di cambio riba dje, y logicamente pendiente di Parlamento cu su derecho di amienda, ora cu e ta wordo trata den e organo democratico aki.
