Ley di Serlimar trata den ambiente di preocupacion y polarisacion

Ayera a trata e adaptacion of cambionan cu a haci na e ley di Serlimar cu ta data di 2005. E cambionan cu minister di Infrastructura y Medio Ambiente, Otmar Oduber a introduci den dje a haci cu e ley aki, considera como uno simpel pa un y serio pa otro, a haya un transcendencia. El a bira uno di e mas polemico y controversial cu a trata durante e ultimo añanan den Parlamento.

For di tempran den e ambiente pafo y paden di Parlamento tabata uno di tension, reforsa cu e presencia di gran cantidad di polis. Pero tambe un reunion publico den Parlamento cu a wordo eclipsa cu e noticia di e entrada hudicial cu Landsrecherche y RST a haci bou ordo di Ministerio Publico (OM) den varios residencia di personanan conoci den nos comunidad, entre nan ex minister y Parlamentario, Benny Sevinger.

Sevinger ta un miembro di e fraccion di oposicion cu a yega di vocifera fuertemente su posicion contra e cambionan cu Oduber kier a introduci den e Ley di Serlimar. Sevinger a presenta den sala di Parlamento na ora pa hiba palabra durante e reunion pa trata e ley aki.

Debate politico.
Unabes cu e debate a cuminsa den sala di Parlamento, e miembronan di e diferente fraccion, ya sea di oposicion (AVP) of esunnan di e coalicion di gobierno (MEP-POR-RED) a expresa nan posicion dilanti un publico den tribuna, mayoria di nan trahadonan di e compania priva di recoge di sushi Ecotech y tambe di e compania estatal Serlimar. E panorama aki tabata un fiel refleho di e polarisacion cu e cambio di ley aki a trece den comunidad.

Pa Parlamentario di oposicion, Jennifer Arends-Reyes na prome bista, e ley di Serlimar ta uno simpel. Sinembargo el a haya cu e ley aki ta concerni na e futuro di e conciudadanonan di e pais di Aruba, cu algun di nan a bin Parlamento for di tempran ‘cu e curason den nan man’ pa e siguridad di nan trabou. E echo aki –segun Arends-Reyes– ta merece e seriedad y respet cu nan por brinda den e organo aki pa loke ta nan preocupacion den trabou.

El a trece dilanti cu un di e remarca principal ta cu e ley aki no ta duna un bista completo. Ademas demasiado pregunta cu a wordo formula for di tur angulo y den direccion di e mandatario, sin cu tur a haya e debido contesta, ta dificil pa nan por haya un bista completo na unda kier yega cu e ley aki.

Sinembargo, gobierno a dicidi di bin cu e ley aki, siendo cu tin diferente pregunta y tambe destaho, cu ta andando di parti di gobierno. Tambe e ta kere como parlamentario cu pueblo mester por tin e opcion di scoge e compania cu mester brinda nan e servicio aki, pero e libertad aki a wordo limita of mas bien ‘nan ta duna bo e rumbo pa haci bo escogencia’.

Allan Howell (POR).
Pa e Parlamentario Allan Howell, kende ta miembro di e mesun fraccion di e partido di, a bisa cu e dia di ayera tabata uno cu ‘kisas hopi kier mira yega of tambe kisas cu hopi no kier mira yega.’

E ta kere cu ora cu bo tin un funcion di mandatario of tambe di parlamentario, ta importante pa nan por para pa bienestar general di pais Aruba. P’esey pa Howell na momento cu un politico ta sucumbi pa tuma decision of pa haci politica. Of pa bienestar di un tercera persona, y no pa bienestar general di nos pais, bo ta fout.

E ta mira cu den e debate aki algun a purba desvia di loke nan a bin trata. Y nan a bin –segun Howell– pa trata e problema di nos desperdicio na Aruba y no pa bin fura tera ki compania ta mas potente cu otro. Tampoco pa trece polemica entre e diferente compania. Y mucho menos pa trece un division entre nos propio Arubianonan.

Ademas e ta haya cu e discusion no mester wordo centralisa riba ki compania ta bay gana mas of menos placa. Sino entre otro riba e situacion di salubridad pa e habitantenan di Parkietenbos y bisindario.

Ricardo Croes (POR).
Prome cu Parlamentario Ricardo Croes a trece su punto di bista y su posicion den sala di Parlamento, como e unico miembro di e fraccion di RED, e ta kere cu e controversia cu e cambionan den e ley di Serlimar a trece cune, no tabata necesario.

Segun Croes su opinion personal, tur loke a sosode rond di e ley di Serlimar ta di mas. Pasobra e ta kere den un union den un pueblo chikito, y loke nos a yega di mira ta manera un sorto di separacion. “Ta parce manera campaña politico tin, cu bo ta mira un partido di color aki y un partido di color aya,” el a bisa.

Mientras cu berdaderamente nan a bin pa trata un ley cu ta trata di desperdicio. E ta considera problema di medio ambiente uno grandi y serio, pues esey ta loke –segun Croes- nan mester trata den henter e debate aki. Pero e asunto aki a yega te hasta riba un nivel personal of diferencia entre companianan. E no ta kere cu esaki mester ta e caso.

Como parlamentarionan e ta haya cu ta importa pa cada un di nan trece nan punto di bista, ya cu como miembronan di nos organo legislativo, nan t’ey pa sirbi interes general y no particular.

Pa Croes interes general ta encera cu bo ta hiba den bo balansa tur loke ta opinion di pueblo, gremionan, companianan y interesadonan, cu directamente ta wordo afecta pa un ley. Esaki no ta conta solamente pa ley di Serlimar, sino pa cualkier ley cu nan ta debati den Parlamento, el a bisa.

“Cual ley cu bo ta trece Parlamento mester carga un peso di interes general,” segun e Parlamentario en cuestion.