Siman pasa a presenta un proyecto di ley na parlamento, pa regula y garantisa integridad di candidatonan pa bira ministro, y pa e vigilancia tambe durante e periodo cu nan ta den e puesto. Un momento importante pasobra esaki ta solamente un di e leynan cu nos mester pa yega na por guia y vigila bon gobernacion, integridad y transparencia, manera cu Raad van Advies (RvA) tambe ta señala den nan evaluacion di e ley, di cual tin un resumen extenso den e edicion di awe.

Ironico ta cu na 2015, tempo cu RvA mester a conseha riba un ley encuanto integridad di ministro di e gabinete anterior, nan mester a señala cu e ley tabatin un alcance limita, primordialmente orienta riba stipulacion di regla pa e proceso di nombramento di mandatario. Consecuencia di esaki ta, segun RvA, cu “garantia pa actuacion integro di e ministronan durante (y despues di) e periodo di ta den funcion no ta haya suficiente atencion. Asina e elementonan di independencia y cautela ta solamente verificable di manera limita, ya cu ta miho pa midi e elementonan aki pa e duracion completo di e periodo di funcionamento como mandatario.”

Tambe RvA a menciona e tempo ey caba, cu e ley di integridad di mandatario mester ta parti di un pakete mas amplio y integro di medida legislativo y administrativo. RvA: “ Por pensa riba legislacion cu ta haci obligatorio transparencia den financiamento di partido politico y legislacion cu ta duna proteccion na ‘klokkenluiders’, pero tambe riba codigo di conducta cu den adicion na regla legal ta promove e consciencia encuanto integridad y ta evita abuso di poder, conflicto di interes y discriminacion.”

Laga nos cuminsa cu bisa cu den e actual propuesta di ley en todo caso a cumpli cu e obligacion pa no preocupa solamente cu e proceso di nombramento, sino tambe cu e proceso di vigilancia cu mester sigui durante y despues di e periodo di a funciona como tal. Esaki ta elimina un omision importante den e reglanan te awor, cu tabata haci e asunto di screening practicamente un ridiculez. Bo ta percura pa bo logra pasa e screening inicial, anto despues ‘cielo a habri pa bo’ pasobra niun hende no ta puntra nada mas… Algo grave, pasobra ta net durante e periodo di ta den funcion e mandatario ta haya e oportunidad di usa su facultad y podernan na un manera robes y por acumula beneficio di un manera delincuente.

Pero tin algo mas cu ta remarcable si nos compara e actual propuesta y esun di 2015. E tempo aya caba RvA a observa cu nan ta spera dentro di un tempo razonable un propuesta similar pa e otro funcionarionan politico, esta e parlamentarionan. Honestamente, nos lo a kere tambe cu lo a probecha e oportunidad pa haci esaki di biaha, ya cu hopi di e reglanan por considera di igual peso y importancia pa e miembronan di e organo legislador. Un oportunidad perdi, cu lo mester haya un continuacion posteriormente di tur manera. Ademas ta importante comenta e otro punto cu RvA ta trece dilanti, menciona anteriormente caba, y cu cual nos ta completamente di acuerdo, y esey ta e resto di legislacion cu falta pa traha un base mas solido posible pa bon gobernacion. Por ehemplo, con a para cu e famoso ley di Ombudsman, cu mester a duna mas contenido na e posibilidadnan di e ciudadano pa apela contra actuacion di gobierno, y cu mester conduci tambe na un aparato gubernamental cu ta opera mas eficaz y mas husto. No bin bisa cu esaki tambe a desaparece ‘pa via di CAft’…

Ademas, nos ta en espera di e ley encuanto financiamento di partido, riba cual ta trahando tambe, segun nos ta comprende, y tambe e ley pa institui un ‘Integriteitskamer’ cu ta haci hopi falta na e momentonan aki, di compromisonan financiero hopi grandi cu ta programando actualmente, cu merece un bon vigilancia di parti di un organismo independiente. Nos tin basta compromiso financiero cu a bay caba sin e vigilancia ey y djis for di punto di vista di preveni ‘sorpresa’ financiero den forma di gastonan no previsto, ta importante pa limita riesgo, aparte di e aspecto di etica, di maneho integro como principio. Tambe mester bin un areglo pa ‘klokkenluiders’, algo diferente cu un funcionario publico cu ta saca informacion di un manera indebido di e departamento unda e ta traha. Esaki actualmente sa sucede asina, no pasobra e persona concerni ta desea di haci esaki di e manera ilegal ey, pero e situacion ta haci cu no tin un caminda legal pa cana, pa canalisa su preocupacion pa algo cu no ta anda bon. Nos ta ripara cu ainda nos mandatarionan, y tambe hefenan di departamento, ta demasiado enfoca riba e ‘mal propaganda’ cu un asunto ta duna ora e sali den luz publico, y menos riba e oportunidad di mehora prestacion di e aparato publico. Y ta net aki ta unda ainda nos tin hopi di haci, y hopi di gana tambe.

Ta di spera cu pronto ta continua cu e trabao grandi aki di crea legislacion necesario y cu no ta dal para ey tampoco, pero cu ta garantisa tambe e debido implementacion di tur e leynan aki.