Desde aña 2020 a trata e mesun ley aki den parlamento sin exito como cu e tempo ey Lejuez y Croes di RED a vota contra. Awe un aña despues cu un constelacion nobo den parlamento, e ley ta bira un realidad, di cual Aruba ta e ultimo Pais den Reino pa cumpli pa tin un ley di screening ministers. Desde 2012 Curaçao a pasa nan ley di screening ministers, y na october 2014 St. Maarten a pasa nan ley tambe.

Na Aruba e ley pa screening minister tin un trayectoria largo como cu ta desde aña 1997 ‘Rapport Calidad’ a wordo entrega pero e concepto di ley no a mira lus di dia. Na 2015 atrobe e ley a wordo saca di lachi, pero mas bien a wordo usa pa acomoda ex-minister Croes di AVP e tempo ey ora cu e a wordo encarcela.

Y awe despues di a vota riba 5 amienda y 2 mocion e ley a keda aproba pa un gran mayoria, menos di parlamentario Mansur cu a vota contra e ley. Ley di screening pa parlamentario na caminda E ley aki cu a pasa ta trata screening minister solamente, pues e no ta aplicabel pa parlamentarionan.

Y corectamente Conseho Consultivo di Aruba na cinco ocasion a conseha parlamento di Aruba pa percura pa e reglanan integridad conta pa parlamento tambe. Esaki netamente tabata e conclusion tambe den e reunion aki, como cu nos como parlamentario ta di opinion cu integridad tin di conta pa parlamentario tambe.

Mas cu esey, ta importante cu den e proceso aki cu parlamento ta preparando pa independisa como instituto, pa parlamento tin su codigo di conducta tambe como e organo mas halto di nos Pais.

E pregunta serca hopi ta dikon te cu awor ta pasa e ley di screening minister siendo cu gobierno a huramenta na september 2021. Manera mi a splica, no tabata tin un mayoria pa por a logra esaki na 2020, pesey formador a aplica e ‘landsbesluit’ pa por a screen gabinete Wever-Croes 2. Den e ley di screening minister compara cu e ‘landsbesluit’ e cambionan mas drastico cu a bira vigente ta, transacionnan inusual di placa y labamento di placa, examen medico, examen psycologico, test di droga, pa menciona algun.

Den e lunanan nos dilanti, parlamento lo cuminsa traha riba e ley pa screening di parlamentario segun conseho duna pa Conseho Consultivo di Aruba. E pregunta cu ta reina ta ken lo pasa esaki? Ban spera cu lo tin e boluntad politico pa sigui lucha contra corupcion den tur forma y nivel y cu lo por pasa esaki, segun Tevreden.