Prohibicion di uzo di saco di plastic ta na vigor anto e ta conta pa tur supermercado como tambe pa tur tienda. E ley aki a drenta na vigor riba 1 di Januari 2017 cu iniciativa di parlamentario Donny Rasmijn kende a lansa e campaña di conscientisacion y preparacion pa introduci e cambionan aki.

“Mi ta wak cu hopi hende ta cla caba pe como tambe hopi tienda y supermercado. Tur cos ta bayendo bon mester djis awo segura cu no ta bay tin luga cu lo keda sin haci e,” parlamentario Donny Rasmijn ta bisa. 6 luna pasa e ley aki a wordo aproba anto tabata tin caba cantidad di preparacion tumando luga pa implementa esaki. Sr. Rasmijn ta comenta cu: “Mi ta kere cu tur hende a haya basta tempo anto a wordo avisa basta trempan. Mi ta kere e idea ta pa sigur cuminsa for di awo anto cumpli cu e ley anto ban spera cu pronto nos ta completamente  liber di saconan di plastic.”

Supermercadonan 
Supermercadonan grandi manera Superfood, Certified & Ling & Sons ta prepara pa e cambionan aki sin ningun problema. Sr. Rasmijn ta bisa cu e ta experienciando cu supermercadonan chikito tambe ta prepara. Segun e mandatario, tin hopi supermercado chikito cu ta cerca di otro anto esaki por stroba e transicion un tiki. Por ehempel: por tin un supermercado cu kisas si ta duna saco di plastic pasobra e otronan no tin. “Esaki ta e control cu mester tuma luga pa percura cu esey no ta pasa,” Sr. Rasmijn ta bisa.

Gerencia di Cheng’s Supermarket na Noord ta splica Bon Dia Aruba cu nan a prepara pa e ley aki 10 aña pasa.  Nan a pensa cu e ley aki ta bay pasa e tempo ey anto nan a cumpra un cantidad grandi di tas pa nan bende. “Nos a perde hopi cliente pasobra sin e servicio di saco di plastic nan ta bay cumpra un otro caminda. Awor mi no por prepara si no tin nada cu ta concreto,” gerencia di Cheng’s ta comenta. 10 aña pasa e ley no a pasa pues nan a perde hopi placa den e tasnan cu nan a busca. Nan a busca 100.000 tas y a tarda casi 10 aña pa bende nan tur. Aworaki nan no ta sigur tampoco si e ley en berdad ta oficialmente na vigor pasobra nan no a haya ningun notificacion oficial segun gerencia. Aunke cu esaki a wordo publica den corant y varios otro medio di comunicacion, gerencia di Cheng’s ta splica cu: “Tur hende ta papia pero ami no ta tende nada oficial di dje. Nos no a haya un carta oficial of wak e den corant. Mi no a wak nada concreto.”

Sancion
”Tin diferente luga cu tin saconan re-uzabel cu cliente por cumpra y tin persona cu ta gewoon bin cu nan mesun saco anto esey ta e partinan cu nos kier stimula,” sr. Donny Rasmijn ta bisa.  Si bo no haci e, den e parti di sancion, bo por haya un multa di categoria tres locual ta yega te 10.000 florin maximo. Segun sr. Rasmijn, naturalmente esey ta un parti cu mester traha riba dje pero seguramente riba e prome biaha, bo ta haya un cierto nivel di multa anto pa e di dos biaha mas halto te ora e sigui crece. E maximo ta un multa di 10.000 florin anto polis ta encarga cu esaki como tambe tin apoyo di Dienst Natuur & Milieu, City Inspector anto rednan social cu segun sr. Rasmijn, e ta un medio di control hopi poderoso cu lo yuda den esaki. “Si lo tin algun comerciante cu no tene su mes na ley, nos ta pidi cooperacion di tur hende cu lo wak esaki pasa pa no solamente yama autoridad encarga, pero seguramente tambe pa comparti cu e comunidad pa asina e implementacion di e ley aki bay den un manera mas exitoso,” sr. Rasmijn ta comenta
.