Alex Faro ta representante di e piscadonan a lamenta cu Departamento di Naturalesa y Medio Ambiente (DNM) a elabora un lista basta grandi di especie di pisca protegi pa medio di un ley (landsbesluit).
E piscadonan a laga sa e director di e departamento aki, Gisbert Boekhoudt nan preocupacion ya cu esaki tin su impacto economico pa e piscado.
Impacto economico
Segun sr. Faro, e piscadonan ora cu fin di luna yega no por bay un ATM pa swipe. Pero a nan por sinta atras di un lessenaar anto tur luna cobra nan salario trankilo asina.
Nan a bin cu e ley aki cu mester a drenta na vigor dia 15 di augustus, sin sa e gastonan cu un piscado tin. Pero e trabou cu nan tin prome cu yega na e punto final di nan placa di luna. Tin biaha nan ta subi lama haciendo gasto no menos di 200 florin y tin biaha sin coy nada.
Ora cu bo ta yega tera ken ta duna bo algo ningun hende. Gamble bo ta gamble. Pero a nan cu ta sinta tras di un lessenaar si tur fin di luna ta trankilo, e ta bisa.
Sr. Faro a declara cu un punto cu mester tene cuenta cu e piscado ta cu prome cu bo ta bin pone un medida fuerte pa un piscado, sinta cu nan y wak ken ta di acuerdo. No hisa un cos y benta riba e piscado bay biba cu ne.
Ley di proteccion fauna y flora
Den nomber di e piscadonan di Aruba, sr. Faro no ta haya corecto cu nan ta bin implementa leynan di proteccion cu ta bin di afo, particularmente di paisnan grandi, y nan ta purba di introduci sin consulta debidamente den un isla chikito manera Aruba.
Na Merca pa ehempel tin cantidad di boto cu ta pisca tur dia, na Aruba alrededor di 100 boto ta den e actividad aki directamente. Nan no ta contra cu mester protege algun especie pero mester tene cuenta pakico y con esaki lo por afecta e sector primario y tradicional di piscamento na Aruba.
Un di e pisca protegi ta buni of bonito cu ta un parti di e as cu e piscadonan ta uza pa bay pisca. E ta haya cu aki un par di dia ta sosode mesun cos cu secat, piskechi y masbango.
E ta premira cu e piscadonan lo mester importa tur e asnan pa nan pisca. “Unda nos ta bay yega!. Un Chines si por bende nan den un supermercado, pero nos pober piscado Arubiano no por busk’e pa nos pisca.” E ta conclui cu si e tipo di especie aki ta prohibi e no mag drenta Aruba absolutamente, ni sikiera pa bende nan den supermercado.
Mal contento
Den un forma crioyo sr. Faro a bisa cu ora un piscado ta baha su liña e no por manda un borchi abou pa bisa: “Ey abo no mag di come akinan>’
Uzando su logica di piscado, ora cu nan ta baha nan liña nan no sa ki sorto di pisca ta bay cay. Kiermen ora cu nan ta subi cu nan den boto y ta resulta cu ta un especie protegi, e pregunta ta: kico bo ta bay haci cu e pisca? Lag’e bay?
El a bisa cu dificilmente nan no por laga e pisca bay of tira bek den lama casi morto. Pasobra si nan tin un gasto grandi y nan ta coy un di e piscanan cu ta cay riba e lista di proteccion y e piscado no a coy nada prome, e no tin otro alternativa cu bay cu e pisca pa alivia parti di su gasto.
E problema cu nan kier evita ta cu si nan ta bin tera cu un pisca protegi y polis ta dal nan un boet, nan gasto ta bira mas grandi. Pasobra nan no tin consideracion cu bo.
Otro piscado, Nicolas Kelly a bisa cu e ta coy pisca como as, entre nan masbango. Pero tambe e sorto di pisca ta uno mas gusta na Aruba. Pero awor ta cay riba lista tambe, e tin como keho.
