Awe DNM ta contento di anuncia cu e fecha oficial cu e ley ta bini na vigor ta, dia 1 di juli 2020. E no ta noticia cu mundialmente tin hopi esfuerso ta wordo haci pa caba of minimalisa e uzo di productonan di plastic di un solo uzo.
Manera ta conoci aña pasa 2018 Ministerio di Desaroyo Territorial, Infrastructura y Medio Ambiente tawata cla pa introduci riba 1 di januari 2019, e ley di prohibicion di “single use plastic.” Nos ta referi na productonan desechabel di plastic di un solo uzo, pero tambe e prohibicion di productonan cu ta contene kimico oxybenzone den cremanan antisolar. Gobierno di Aruba a anuncia e campaña ‘Choose Zero, cual ta encera nada di plastic, nada di foam y nada di oxybenzone. Abo tambe por compromete na e solucion.’
Mundialmente polucion di plastic ta un fenomeno alarmante como cu esaki ta forma un peliger pa nos naturalesa y medio ambiente. Na Aruba tambe nos mester ta mas consciente di e uzo di productonan desechabel di plastic manera plastic cups, plastic forki, cuchara, cuchiu y pijp. Nan so no ta daña nos medio ambiente, pero tambe productonan cu ta contene oxybenzone den cremanan. E prohibicion aki ta encera benta, distribucion y otorgamento di e productonan ya menciona.
Mientras cu nos ta conscientisa pueblo di e dañonan di polucion di plastic, hunto cu esaki ta bini leynan cu mester ta bon funda y cu mester haya aprobacion pa asina tin un base solido pa controla e prohibicion. P’esey e implementacion di e ley a conoce un tardansa. Ademas a brinda comercio tempo suficiente pa haci tur cambio necesario pa cumpli cu e ley.
Pa duna un ilustracion di e problematica y e rason pakico e ley mester bini, nos ta comparti algun data cu a yuda nos yega n’e decision aki. Nos tin un populacion di mas o menos 120,000 hende y Aruba ta ricibi anualmente mas di 1,000,000 bishitante pa aña y un otro cantidad di 600,000 bishitante di turistanan diario cu ta yega cu crucero den un aña. Nos ta un isla na unda mayoria di e productonan ta wordo importa. Por djis imagina cuanto producto ta wordo uza y mayoria biaha ta scoge pa facilidad e productonan di un solo uzo. Hende mester ta mas consciente di nan uzo y tambe di e consecuencia di e uzo excesivo di esakinan y kico e tin ariba nos medio ambiente.
Directie Natuur en Milieu kier a trece dilanti cu e ley su fecha di implementacion ta 1 juli 2020 pero ta haci un peticion pa di awor aki caba nos cuminsa adapta nos manera di consumo y compra. Ta di menciona cu tin productonan alternativo cu ta mas responsabel pa cu nos medio ambiente (milieuvriendelijk). Haciendo esaki bo por yuda sigura un medio ambiente mas saludabel pa nos futuro.
