E ley pa proteha 17 areanan, cual originalmente tabata 16, actualmente ta na Conseho Consultativo (Raad van Advies), mescos e ley tocante marine park, segun minister di infrastructura y medio ambiente Otmar Oduber (POR).
Pa e minister e idea ta pa hinca tur e areanan aki bou capa di Parke Nacional Arikok, cual durante combersacionnan cu e parke tabata un rason dicon a trece dilanti e punto di tin un directiva cu no ta maneha e parke diariamente si no cu ta controla loke e maneho diario ta haci. Esaki ta e asina yama structura di 2-tier.
Esaki ta pa preveni cu e organo di control por haci su tarea di mantene bista riba kico e maneho diario ta haci sin mete directamente den esaki, segun sr. Oduber. “Asina nos ta parkeer tur e 17 areanan, incluyendo e parke marino bou un solo parke unda cada area naturalmente lo tin su directiva pero cu un solo board ta controla tur.”
E mandatario ta haya importante pa keda inverti den e mantencion y proteccion di areanan destina pa conservacion, tanto di lama como riba tera. Esey ta e rason dicon a dicidi di hinca esaki bou parke nacional mirando cu di e manera aki por keda inverti den e areanan protegi, marine park y tambe e parke como tal, segun e minister.
Anteriormente e minister tabata di opinion cu mester bay traha un fundacion nobo pa maneha esaki mirando cu e structura di e directiva tabata dun mucho poder na un grupo chikito di individuonan, pero su opinion a cambia riba esaki pa asina reforsa e ‘business model’ di e parke.
