Dos ley cu ta andando pa basta tempo caba, finalmente a drenta Parlamento: E ley di Ombudsman y ley di financiamento di partido politico. Asina Minister Presidente, Evelyn Wever-Croes a informa ayera dialuna. El a bisa cu nos ta habri un siman di “hubilo” cu e anuncio di e dos leynan aki cu tin di haci cu e topico di integridad.
El a cualifica e hecho aki di ‘hubilo’ ya cu Aruba ta e unico pais den reino cu no tin e figura di un Defensor di Pueblo of “Ombudsman.” E ta un ley di iniciativa di full Parlamento.
Unabes cu e figura huridico ta wordo institui un hende por yega bati e porta di “Ombudsman” ora cu ta sinti cu su derechonan no ta wordo respeta y e no tin mas caminda pa cana. Tambe cu e institucion di e “Ombudsman” ta bay tin un kinder-ombudsman cu ta bay atende cu e tema relaciona cu abuso di mucha y derechonan di mucha.
Intencion ta pa e figura di “Ombudsman” lo wordo hinca den nos Constitucion. Igualmente lo cuminsa e proceso pa busca un “Ombudsman.” El a bisa cu e nombramento lo ta uno totalmente independiente y e ta wordo haci pa medio di Parlamento. Pronto lo bin cu un oficina di “Ombudsman” cu ya caba ta presupuesta y e ta resorta den e cartera di Minister Presidente.
Igualmente e ta considera “sumamente importante” e ley di financiamento di partidonan politico, ya cu e lo yuda combati corupcion. E ley aki ta busca un paro na e fenomeno aki.
E ta haya cu donacion pa un campaña politico ta posibel, pero na midi y cu transparencia. Un partido politico por haya donacion te cu 3 mil florin, y e tin cu hiba un registro di e suma aki. Pero ariba di 3 mil florin, esaki mester wordo publica y riba 30 mil florin ta prohibi.
