Durante tratamento di presupuesto complementario e aña aki, parlamentario y lider di fraccion RAIZ, Misha Raymond a trece dilanti e topico di minimumuurloon (salario minimo pa ora) y alabes a dirigi pregunta na minister di Labor, Glenbert Croes tocante e mesun topico aki.

E ley di salario minimo pa ora mester a keda introduci dia 1 di januari 2024, pero esaki no a sucede. Despues kier a haci un introduccion simbolico dia 1 di mei 2024, pero tampoco no a tuma luga. Ainda no a finalisa e proceso pa introduccion di e salario minimo pa ora, pero segun e parlamentario a indica recientemente e proceso ta avansando.

Den un video publica ariba su pagina oficial di Facebook, parlamentario Raymond a splica cu na september 2022 el a entrega e prome carta na minister di Labor, minister Glenbrt Croes, pa loke ta trata introduccion di salario minimo pa ora.

El a remarca cu e ta enfoca riba e palabra minimumuurloon pasobra e sistema actual ta dicta cu si un persona traha 40 ora y otro persona traha 45 ora, tur dos persona por gana e mesun salario minimo.

Raymond ta subraya cu ta importante pa hendenan cu ta traha 40 ora of 45 ora wordo paga a base di e oranan cu nan ta traha y no a base di un salario cu ta wordo stipula, cual ta e salario minimo. “Esaki ta un sistema mas husto e ta duna tambe di sa na e trahado, bo ta wordo paga pa bo oranan, no pasobra tin un salario fiho cu ta poni eynan, cu bo lo mester wordo paga,” el a agrega.

E parlamentario a indica cu segun e por compronde, e ley di salario minimo pa ora (minimumuurloon) ta den un proceso avansa y cu dentro di poco e lo wordo entrega na Raad van Advies pa conseho pa despues e ley por sigui cana su caminda pa e por haya introduccion na Aruba.

Durante e tratamento complementario, parlamentario Raymond a puntra minister Croes cu ki seriedad ta tumando e aspecto di minimumuurloon, kico falta, pakico e ta tardando, si e tin prioridad y pa ki tempo ta premira cu lo introduci minimumuurloon.

El a remarca cu teniendo na cuenta cada desaroyo cu tin, cual ta afecta e tur ciudadano y e clase trahado, Raymond a resalta cu for di su punto di bista “mester tuma mas serio” con por mehora e situacion di e trahadonan, sobre todo pa e trahadonan cu ta traha mas di e oranan cu ta wordo indica, pero cu no ta ricibi nada extra fin di luna y con nan ta wordo compensa pa esaki.

Minister di Croes a contesta e parlamentario y a subraya cu nan ta tuma e tema di introduccion di minimumuurloon “hopi na serio”.