Den un reunion publico masha cortico mes, unda votacion so mester a tuma luga, ayera den oranan di atardi a tuma luga e votacion final pa ley di introduccion di matrimonio di mesun sexo, cu 10 voto na fabor y 10 contra, aunke ainda ta falta e decision di casacion dia 12 di juli.

Ayera atardi tambe un publico un tiki mas chikito compara cu esun di 8 di mei a logra drenta casi na ora di e votacion, pa motibo cu CEA y Polis no a duna permiso pa drenta na tempo, algo cu algun hendenan cu tabata kier scucha e prome ponencia a cuestiona.

E votacion a keda igual cu esun anterior. Esnan cu a vota contra ta Mike Eman y Arthur Dowers di partido AVP; Hendrick Tevreden, Alvin Molina, Darlaine Guedes Erasmus, Arthur Vallejo, Marco Berlis, Edgard Vrolijk y Ricky Hoek di partido MEP; y Ryçond Santos Do Nascimento, parlamentario independiente.

Esnan cu a vota na fabor di e ley ta Miguel Mansur di partido Accion21; Misha Raymond y Raymond Kamperveen di partido Raiz; Marisol Lopez-Tromp y Aquannette Gunn di partido MAS; Benny Sevinger, Mervin Wyatt Ras y Mike de Meza di partido AVP; Gerlien Croes, parlamentario independiente y Setty Yarzagaray di partido MEP.

Misha Raymond: “A opta awe pa duna balor na discriminacion y no na igualdad”

Despues di e votacion, redactor di Bon Dia Aruba a puntra un di e parlamentario cu tabata respalda e proyecto aki, Misha Raymond, pa su opinion. Raymond a bisa cu e lucha no ainda no caba. “12 di juli casacion mester duna su resultado, djis pasobra un ley ta ser rechasa no kiermen cu bo no por entrega atrobe. Tin pasonan cu nos por tuma, mi ta kere e siguiente uitslag cu ta casacion ta uno hopi importante na e momentonan aki. Locual mi ta lamenta ta cu nos parlamentarionan no por a wak, compronde y duna balor na kico e resultado tabata di HOF cu ta bisa cu no por tin discriminacion y toch a opta awe pa duna balor na discriminacion y no na igualdad,” el a sigura.

Manera el a menciona, dia 12 di juli casacion lo duna su resultado y “mi ta spera cu eynan si lo por haci lo corecto y duna balor na kico ta lo corecto y esey lo bay duna na hendenan cu kier casa, parehanan di mesun sexo, e balor di no ser discrimina den nos comunidad.”

El a dirigi algun palabra na e parehanan aki cu tabata wardando un resultado diferente den parlamento, na unda a señala cu “esaki no ta e final. Nos ta den luna di Orguyo, mi ta kere nan por ta orguyoso di nan mes y mi ta orguyoso tambe di e papel cu mi a bin ta hiba, e lucha cu mi ta hiba, pero e no ta caba awe. Mi no kier biba den un comunidad unda cu discriminacion ta esun cu ta reina den tur cos.”

Ryçond Santos do Nascimento: “Nos mester duna e dignidad na cada persona, pero matrimonio mester keda sagrado”

E parlamentario independiente cu tambe for di dia 1 a trece su punto di bista dilanti, Ryçond Santos Do Nascimento a sigura cu esaki tabata un topico cu den comunidad tabatin dos posicion basta fuerte. “Locual ta importante pa compronde ta cu e pais aki ta kere den normanan y balornan tradicional, esey no ta kita cu nos mester respeta e dignidad di cada persona. Esey ta hopi importante, pero tin otro manera pa regla pa un hende por duna contenido na su bida manera cu e kier. Den e caso aki, full e polemica tabata rond di e nificacion di matrimonio, kico matrimonio ta nifica, y si matrimonio ta algo reserva y sagrado den su esencia unda cu e diseño di e homber ta traha pa un funcion social, su curpa ta traha pa un hende muhe y bo ta wak cu e curpa di hende muhe ta traha pa hende homber, e curpa di hende muhe ta traha pa duna luz na bida y alimenta e yiu, asina a bin cu un diseño for di un perspectiva cristian y catolico. P’esey e discusion ta bay hopi profundo, nos ta kere cu nos mester duna e dignidad na cada persona, pero matrimonio mester keda sagrado.”

Carlos Guiamo, hurista, a splica na Bon Dia Aruba cu ora un votacion keda empata, mientras no tur parlamentario tabata presenta, un di dos votacion tin cu tuma luga. Conforme Reglement van Orde, si e di dos votacion tambe keda empata, e ley ta considera desaproba (verworpen). Pues e di dos votacion ta e ultimo y si e keda empata mes, no tin un di tres votacion y e ta keda desaproba.

Esaki ta algo cu activistanan manera Fundacion Orguyo a señala, cu ta nifica un retraso hopi grandi. Ta keda warda solamente riba decision di casacion dia 12 di juli.