Den un reunion publico di aproximadamente 12 ora caminda publico di diferente opinion tabata presente pa nan duna apoyo of nan rechaso, e ley di iniciativa di matrimonio di mesun sexo a tuma luga na Parlamento di Aruba unda e ley a haya 10 voto na fabor y 10 contra, loke ta nifica cu mester agenda un otro reunion pa por tene un votacion definitivo.

Ayera no tabata un reunion publico cu ciudadanonan ta custuma cune, e palabra “sensitivo” semper tabata presente unda hasta e siguridad di e parlamento a ser reforsa cu personal di Cuerpo di Polis por si algun incidente lo por a tuma luga.

E iniciadonan di e reunion tabata parlamentarionan mes den e caso aki cu tabata sinta na unda normalmente ministernan ta sinta, nan a haya un ronda di 20 minuut pa trece dilanti nan punto di bista, despues di dos tanda 10 minuut mas, na final un votacion a tuma luga cu un resultado igual, 10 voto na fabor y 10 voto contra ley di matrimonio di mesun sexo.

Hendrick Tevreden di partido MEP tabatin e prome punto di ordo pero a pidi pa un schoorsing di 15 minuut pa motibo cu e fraccion mester a discuti algun punto importante manera el a bisa.

Parlamentario cu a dicidi di sali for di reunion y abstene su mes di vota ta Shailiny Tromp-Lee ken a sigura cu esaki tabata un “decision hopi dificil” pa su persona, ademas el a skirbi riba su rednan social cu “mi no ta sinti ta na ami pa dicidi ken si of ken no. No ta na ami pa stroba felicidad di otro. Ken ami ta pa husga amor? Ami ta convenci cu mi Dios ta un Dios di amor. Mi dilema ta grandi y mi debate interno ta fuerte. Den mi trayectoria di bida ami semper tin mi opinion, por argument’e y present’e. Echo ta, cu pa e topico aki esey ainda no ta e caso.”

Esun prome na palabra tabata e parlamentario independiente Ryçond Santos Do Nascimento ken a sigura cu “tur hende sin distincion tin derecho riba un existencia digno, pero e ley di awe no ta trata di derecho di bienes, derecho riba herencia, derechonan fiscal y tampoco derechonan social, lo cual ta e reunion di awe pa cambia nos codigo civil, cambia e definicion di matrimonio entre un homber un hende muhe y cambia e modelo di famia cu ta hancra den e definicion aki y cu e pais tin futuro cu e diseño di e matrimonio original.”

Parlamentario di MEP Marco Berlis a expresa cu ta falta algun siman pa decision di casacion y a colecta mas cu 18.000 firma di ciudadanonan cu a haci peticion na gobierno caminda “nos lo prefera di wak casacion bin prome y publica e veredicto mirando cu un gran parti di pueblo ta para tras di esaki, matrimonio di mesun sexo no ta un derecho humano segun IVRM,” el a bisa.

Pa Darlaine Guedez Erasmus e ley aki ta hopi cerca di su curason, creencia, normanan y balor cu tin como comunidad, den su opinion parehanan di mesun sexo na otro paisnan por casa pero el a puntra su mes, “con nan ta mantene nan mes y nan pareha pa e bienestar di nan? Unda nan ta bay biba? Unda nan ta bay come si nan no ta protegi pa trabou? El a bisa den su prome ponencia.

Pa algun parlamentario e reunion aki tabata uno hopi emocional, por ehemplo, Mike de Meza parlamentario di AVP ken a sigura di ta di acuerdo cu matrimonio di mesun sexo pa asina ey apoya su yiu homber y entre otro, a menciona e articulo number 1 di Constitucion di Aruba.

Setty Yarzagaray, unico miembro di partido MEP cu a vota na fabor di e ley aki a habri su mes na e topico aki y a splica cu den esaki mester prepara comunidad pa e transformacion aki, mirando cu ta un topico hopi dificil no solamente pa comunidad pero cu nan ta sintiele tambe den nan mesun fraccion “pa hopi biaha nos ta traha riba un linea y esaki un tipo di ley, cu tur sinceridad cu nos no ta wak otro riba e mesun linea.”

Ademas el a agrega cu e ta para pa igualdad y cu e ta biba cu e topico aki pa mas cu 40 aña ora el a compronde cu su ruman ta pertenece na e grupo aki y cu su mesun mayornan no ta acepta su orientacion sexual “pero con bo tin cu biba cune? Of mi tin cu biba sin e relacion familiar pasobra bo no por wordo acepta y esey ta den bo propio cas,” el a sigura.

Hendrick Tevreden den su ponencia a bisa cu e ta sinti su mes orguyoso pa lidera den e momento aki e coalicion caminda el a sigura cu tambe el a haya menasa na momento cu el a duna su opinion riba e topico aki, “nos no ta papiando di discriminacion, nos ta papiando di diferencia y escogencia, pa tin un argumento di un decision ta algo fundamental democratico, pa kere den matrimonio tradicional ta mi derecho fundamental democratico y den democracia nos mester tin espacio pa diferencia,” el a comenta.

Esnan cu kier a vota mester tabata presente den sala, pa lo cual a causa un discusion entre cierto parlamentarionan cu kier a abstene su mes di duna su voto maske nan tabata presente den e reunion, algo conforme na Staatsregeling.

Un di e parlamentarionan cu a haci impulso di e ley aki, Miguel Mansur di partido Accion21 unda el a splica cu matrimonio di mesun sexo a cuminsa su proceso for di aña 2007 na Censo, ademas e ex-parlamentario Desiree Croes a presenta un amienda y a crea geregistreerd partnerschap na 2016 y Fundacion Orguyo cu a entama dos caso e cual nan a gana.

Pa Mansur, personanan LGBTI ta exactamente manera “nos creador a traha nan “ y esnan cu tin un problema cu personanan LGBTI “ta persona cu tin problema cu nos creador,” el a bisa, ademas a sigura cu su partido ta kere den libertad di e individuo y cu no ta kere cu ta rol di gobierno pa bisa e ciudadano na ken e tin cu stima, cu ken e por casa of con nan mester biba nan bida.

Mansur a bisa cu e derecho si no ser discrimina si ta un derecho humano, y a referi na un pregunta di parlamentario di MEP Marco Berlis, “pero si nos no evoluciona y si nos no trece cambio ainda nos tin sclavitud, ainda hende muhe no lo tin derecho igual, ainda lo tin segregacion, ainda divorcio lo ta prohibi, dus, si nos gusta of laga nos ta obliga di cambia, nos leynan, nos experiencia ta un acumulacion di experiencia, durante siglo y durante e milenio di con miho organisa nos sociedad y esey ta netamente loke nos ta toca awe, con nos por organisa nos sociedad di un manera mas inclusivo cu ni un hende ta wordo laga afo ora ta toca nos leynan civil,” el a sigura.

Misha Raymond di partido Raiz a señala cu el a hiba un lucha fuerte pa esaki y cu ademas cu e topico no ta facil “nos tin cu demostra kico e desaroyo aki por nifica na esnan cu nos ta stima mas,” el a bisa.

Esnan cu a vota pro e ley ta Miguel Mansur di partido Accion21, Misha Raymond y Raymond Kamperveen di partido Raiz, Marisol Lopez-Tromp y Aquannette Gunn di partido MAS, Benny Sevinger, Mervin Wyatt Ras y Mike de Meza di partido AVP, Gerlien Croes parlamentario independiente y Setty Yarzagaray di partido MEP.

Esnan cu a vota contra ta Mike Eman y Arthur Dowers di partido AVP, Hendrick Tevreden, Alvin Molina, Darlaine Guedes Erasmus, Arthur Vallejo, Marco Berlis, Edgard Vrolijk y Ricky Hoek di partido MEP y Ryçond Santos Do Nascimento parlamentario independiente.