Aruba ta na seis ministro persigui pa husticia, ‘and counting’… Den menos di diez aña despues di detencion di e ministro encarga cu labor e tempo ey, actualmente sinta na KIA, nos a mira cinco otro (ex-)mandatario mira persecucion penal. Un score masha malo mes pa cualkier pais. Como agravante, te awe nos no ta mira un cambio den e control cu mester tin den e procesonan administrativo pa preveni repiticion. ‘Por algo será’.

E sucesonan di ayera ta continuacion di e investigacion Portulaca, cu na juni e aña aki a bira conoci pa promer biaha, cu un entrada hudicial na sede principal di gobierno (Bestuurskantoor), unda oficina di e mesun ministro aki a haya bishita di e team investigativo. Esey tabata un indicacion cu e investigacion tabata envolve asunto realmente grave. A resulta awor cu esey no tabata un señal bashi.

Mescos cu e promer caso menciona, ta trata aki atrobe di e trayecto di permiso di estadia y e conseho encuanto mercado laboral cu ta precede e permiso menciona. No ta asina straño cu e tipo di permiso aki ta keda vulnerable pa corupcion na nivel halto, mirando e volumen di permiso di estadia y e interesnan economico (genuino o no) involucra. Ademas, si nos tira un vista riba e situacion durante ultimo 25 aña, nos por mira cu casi nunca tabatin tranquilidad riba e tereno aki. Den ultimo añanan di decada di 90 y promer añanan di decada di 2000 tabatin dos caso di retiro di e dirigente principal di e entidad di ministerio di husticia (DOOV) pa corupcion cu permiso di estadia. Despues a bin algun aña despues e caso di e ministro di husticia cu bao presion Hulandes mester a laga e tarea di admision di stranhero na su colega encarga cu infrastructura, pa no haya su retiro via e mecanismo pa esey di gobierno Hulandes.

Mirando e trayectoria escandaloso di permiso di estadia a traves di tanto aña, e pregunta clave ta: kico gobierno(nan), incluyendo esun demisionario actualmente, a haci pa purba pone un paro na e serie di caso penal cu nos a mira. Den esaki nos no ta referi na e medidanan general pa garantiza integridad y trata di evita corupcion, manera a sucede cu e introduccion di e ley di integridad na december 2021. Esey ta stipula kico mester haci ora e problema a surgi caba, y ta obliga e ministro concerni pa tuma su retiro, loke riba su mes ta bon, pasobra anterior na esey, ni siquiera esey nos tabatin. Nos interes specifico ta: kico gobierno ta haci pa mehora mecanismo di control dentro di administracion publico pa por haya pista di eventual proceso o accion cu no ta cumpli cu e normanan prescribi? Esaki riba su mes no ta un pregunta reciente so; 20 o mas aña pasa tambe empleado publico integro tabata puntra nan mes con pa detecta asunto cu no ta cuadra cu integridad.

Por tabatin cambio desde e asina yama ‘ontheffing’ cu e anterior ministro di labor delincuente tabata gana placa cune? Lo tabata posible pa set up un otro trayecto delincuente cu ta evita e supuesto ‘erornan’ cu a comete den e caso anterior? E metodo anterior tabata basa riba un cambio den e conseho laboral cu e departamento concerni tabata duna. Den caso cu e departamento duna un conseho negativo riba un cierto peticion, e dunador di trabao por a acudi na e ministro di e tempo ey pa haya un ‘ontheffing’ (excencion), cu tabata un eliminacion di e conseho negativo original. Cu e conseho faborable aki e empresario por a acudi na Dimas pa haya un permiso di estadia pa e empleado concerni, contra pago naturalmente. A proposito, no ta corecto pa yama e conseho laboral un ‘werkvergunning’, esey e no ta.

Ta di supone cu e trayecto aki a bira obsoleto, y si un persona ta desea awendia di practica corupcion e lo mester haci esaki di un manera diferente, no treciendo e problema directamente den despacho ministerial. Tin dos manera pa haci esaki, uno ta (laga) acerca un empresario promer cu e conseho laboral sali, y cobra pa e conseho laboral positivo cu ta keda administra den e sistema digital. E otro metodo ta, si acaso tin un conseho negativo caba, soborna hende cu tin acceso na e sistema digital, cu derecho di haci cambio riba e conseho. Den e era moderno aki nos mester contempla e posibilidad tambe cu tin hende externo, cu no ta personal fiho di e departamento, cu tin acceso na e sistema digital. Claro cu den e actual fase di e investigacion nos no lo haya mas detaye tocante esaki, pero sin duda algun esey lo bin ainda.

Decision cu a perhudica integridad

Gobierno no a trata solamente di mehora integridad, pero a tuma decision cu a empeora e situacion di integridad, e decision pesimo tuma pa sucumbi pa exigencia di e mandatario acusa actualmente, cu e mester a haya control di tanto conseho laboral como e decision riba e permiso di estadia mes. Desde 1986 te recientemente semper tabatin e dos procesonan aki den man diferente y asina mes tabatin bastante problema di corupcion. E medio aki tabata practicamente e unico cu a adverti pa e peligro di pone ambos trayecto den man di e mesun mandatario. No ta conoci ainda kico ta e acusacion formal finalmente, pero ningun fiscal o procurador por yega man bashi cerca huez comisario pa aprobacion di entrada hudicial den oficina y cas di un mandatario. Ley di integridad no ta preveni corupcion, e medidanan preventivo ta haci falta keto bay…