Tin elemento contra constitucion
Tratamento di e ley riba integridad di mandatario a duna un show mediocre, unda a bira bon cla cu tin hende den parlamento cu absolutamente no sa kico ta integridad. Bo por formula ley riba integridad, pero esey no ta bisa cu bo ta practica integridad. E lider di fraccion AVP a bin cu un ley riba integridad di politico, cu manera por a spera ta trata principalmente e aspectonan cu tin di haci cu screening di e mandatarionan. Pero na ultimo momento e ley a keda abusa como frame pa pone otro cos aden cu no ta pertenece ey.
Na ultimo momento a hinca aden e asunto di suspension di un ministro cu ta bao sospecho hudicial y ta deteni ( den voorlopige hechtenis). E ley aki ta ordena awor cu e ministro ta suspendi pa ley (van rechtswege geschorst) den caso di detencion. E parti aki ta keda manera algo strao den e ley, cu por lo demas no ta trata otro aspecto di un mandatario den problema cu husticia. E problema ta keda cu Constitucion di Aruba no conoce e forma di e ministro cu ta suspendi, solamente un ministro cu ta ministro, o no ta mas pasobra el a retira, o pasobra parlamento no tin confianza mas den su persona y e mester bay.
Aki atrobe ta trece aden e forma cu St. Maarten tin esaki regla, unda den nan constitucion nan tin regla cu den caso bon describi, ta suspende o retira un ministro pa ley. Nos constitucion no tin e areglo aki, pasobra e tin un otro punto di salida. Kico esaki ta, Basicamente e pensamento cu un ministro ta actua segun norma di integridad. Kico eseynan ta dicta, Cu ora bo haya bo den problema cu husticia como ministro, bo ta tuma bo retiro. Nos ta tende esunnan den gobierno ta cuminsa grita atrobe: Si pero hues no a condene ainda, anto boso ta haci esey caba& pakico boso ta exigi cu e mester baha, Masha simpel, pasobra no ta bay pa e hecho cu e ta condena irevocablemente pa corte. Ta bay pa e pensamento cu como mandatario bo no mester a haya bo mes den e situacion ey. No ta nada normal cu un ministro ta haya su mes bao sospecho hudicial y pa no causa mas berguensa na bo gobierno, partido y comunidad, bo ta retira. Den nos sistema bo no ta keda desampara tampoco como ex mandatario.
Bo ta haya bo overbruggingstoelage y si bo keda rehabilita, bo ta bolbe na bo puesto, sin problema.
Punto ta keda cu nos constitucion ta traha a base di un pensamento, cu no tabata necesario pa pone tur e proceso aki aden. Si tanto aa despues nos ta pensa diferente, anto ban hinca henter e asunto, manera St. Maarten tin esaki regla, pa suspension como tambe retiro, den nos constitucion.
Tanten esey no tuma luga, ta keda e pregunta si por cambia derecho estatal, den cual ta regla e relacion entre Rey y mandatario, di tal manera den un ley, cu pa colmo ta haci e traspaso di e cartera di e ministro suspendi via un decreto, mientras cu constitucion ta bisa cu esaki mester ta via ley (Landsverordening). En todo caso algo pa huristanan di taya duna nan veredicto ariba.
En todo caso nos por bisa si cu e teatro cu a tuma luga den parlamento atrobe a duna nos un muestra di kico ta e diferencia entre teoria y practica, entre papia y haci. Den e caso aki anto e ley ta e teoria y e practica ta bin dilanti den e dianan aki den parlamento mes, ora ta trata di atende e tantisimo casonan di corupcion den gobierno. Por ehemplo e situacion escandaloso cu ta tumando luga den negoshi cu tereno publico, y ningun parlamentario di banda gubernamental tin sikiera e curashi o decencia di tira un bista den e pos aki. Ki bal bo ta screen ministro y parlamentario, si despues bo no ta dispuesto pa duna oido na sealnan for di comunidad, cu aparentemente tin algo malo andando den e gobierno cu bo ta sostene, Ningun hende ta spera di bo cu di biaha bo mester kere tur rumor cu ta yega cerca bo, pero tampoco ta normal pa descarta tur cos sin mas, y di manera aki fortificando e idea cerca e mandatarionan cu nan por conta cu bo apoyo incondicional y cu nan ta riba ley, Ta e actitud di complice aki a haci posibel cu tin mandatario a bira asina hambra pa placa, keriendo cu nada no por pasa nan. Berdad di banda di nan coleganan nan no tin nada di teme, pero ta bon cu nos ta biba den un Reino unda tin supervision.
E complicidad aki y ta mira tambe den tur e reglanan na inicio di e trayecto, pero con ta para cu control na final, Ken ta controla si despues cu nan a tuma distancia como doo di propiedad, nan no tin acuerdo secreto pa keda doo toch, Nos a yega di tende di investiga despues cu nan sinta, Ken ta dispuesto pa para nan compadernan, Esey ta integridad.
