Dialuna 19 di Augustus pa 3pm e ley di iniciativa di “Referendum” a keda oficialmente entrega na Parlamento pa ser manda pa Raad van Advies. Manera pueblo sa, Aruba no conoce un “referendum” den su constitucion ainda manera Corsou y St. Maarten. Corsou y St. Maarten a revisa y expande nan Constitucion na 2010 y a probecha pa inclui referendum pa pueblo por dicidi riba temanan controversial.
Desde 1986 Aruba no tin un referendum regla den su constitucion
Ta un hecho cu Aruba desde 1986 no tin un referendum inclui den su constitucion pa resona e voz di pueblo. Segun un comunicado di prensa di parlamentario Marco Berlis (MEP), “referendum ta un herment cu ta reforsa e influencia di pueblo den decision crucial cu por afecta e cultura y tradicionnan di e pueblo. Ta p’esey como iniciador di e ley di “referendum” hunto cu co-iniciadornan colega Hendrik Tevreden, Shailiny Tromp-Lee, Darlaine Guedez-Erasmus, Roderick “Ricky” Hoek, Louisette “Setty” Yarzagaray, Alvin Molina y Arthur Vallejo nos ta sumamente satisfecho y contento di por cuminsa e trayecto oficial di e ley di iniciativa aki den Parlamento. Como representantenan di pueblo ta nos meta pa empodera pueblo y traha leynan pa haci nos democracia mas resiliente.”
Cual ta e trayecto cu e ley di “Referendum” mester cana awo?
E ley a bay Raad van Advies y ta di spera cu e conseho lo por tarda 6-8 siman pa keda cla. Unabes cu e conseho keda cla e ta wordo manda back pa a iniciadornan. E siguiente paso lo ta pa contesta e preocupacionnan di Raad van Advies su consehonan y crea e contestacion den forma di e “Nader Rapport.”
Ora e Nader Rapport keda cla ta entrega e Ley, e Memorie van Toelichting (splicacion di e ley), e Conseho di Raad van Advies y e Nader Rapport na Parlamento pa coleganan lesa, analisa y haci pregunta riba dje. Despues di a ricibi e preguntanan nos mester contesta esakinan oficialmente, pa despues pone un fecha den Centraal Commissie pa e reunion publico cu lo bay trata e ley pa e keda aproba of desaproba pa Parlamento.
Marco Berlis: “Durante di e ultimo tres añanan mi a bin cu varios idea pa introduci leynan cu lo empodera y tambe cu lo salvaguardia derechonan di nos pueblo. Den e lunanan nos dilanti nos lo introduci otro ley pa Raad van Advies. Nos lo anunci’e pronto, keda pendiente!”
