Desde 2014 tin un preocupacion entre casinonan relaciona cu ley nobo pa prohibi humamento den lugar publico. E ley ta uno cu nan ta sostene pero sin laga afo cu e ta bay trece consecuencianan financiero pa e casinonan y caha di gobierno. Esey Ricky Tromp, encarga cu e casino na Hyatt y directiva di Asociacion di casino ta informa Bon Dia Aruba.

Un articulo riba e Las Vegas Review Journal a describi den 2014 e consecuencianan di prohibicion di huma den casino. Esaki segun e Asociacion di casino di Aruba ta algo cu nan a studia y trece pa dilanti na parlamentario Marlon Sneek den 2014. E reportahe aki ta basa riba un analisis completo cu evidencia tambe na con e clientenan a baha den algun casino na Merca pa motibo di a introduci e ley aki. E estado di Delaware na Merca a sufri un caida di 11.3% na 2012.  Na Illinois nan a experiencia 20% anto tin casino cu a declara nan mes parcialmente den bancarota. Na comienso di henter e asunto aki pa introduci e ley na Aruba, segun sr. Tromp parlamentario Marlon Sneek(iniciado di e prohibimento di huma) a ricibi como 150 firma di protesta di empleado pa motibo cu nan salud ta bay atras den casino pa via di huma. “El a splica nos den un reunion cu gran mayoria di trahadonan di casino ta keha riba esey. Nos a bay haci nos research. Ami mes tin 116 empleado, corda Marriott. Kiermen nos tin por lo menos un 500 empleado, con por ta cu e 150 ta e mayoria?”

Sr. Tromp ta bisa cu ora bo cuminsa traha den casino, e exigencianan ta varios. “Bo ta haya bo den un ambiente di huma, sigaria y alcohol. Si bo ta acepta, bo ta haya trabou anto ja despues di tanto aña bo ta bin keha? Nos tin simpatia pa nos empleadonan, nos ta bay di acuerdo pero p’esey nos ta pidi pa duna nos un oportunidad pa haci adaptacionnan necesario pa e ley aki.” Mientrastanto cu nan a bay di acuerdo, a trece pa dilanti cu esaki lo tin su consecuencianan financiero pa tene cuenta cu esaki.

Pa bo ta asocia cu e asociacion di casino, bo mester ta miembro di Ahata anto tur e casinonan aki ta riba mesun liña cu e tema aki. “Nos no ta opone. Pero mester compronde tambe cu e entrada pa caha di gobierno den sentido di impuesto tambe ta bay baha pasobra e tin un impacto. Nos no ta opone pero esaki ta e realidad. E ora a bin acerca cu casinonan cu kier adapta nan luga cu espacio pa humado por haci esey. Esey nos a caba di haci na Hyatt cual ta e prome”, sr. Tromp ta bisa.

Ainda nada ta oficial
Casi tres aña despues cu a trece e tema pa dilanti, awo ta papiando bek di e ley aki pero no tin ningun legislacion oficial ainda.  E ley ‘Landsverordening beperking tabaksproducten’ ta hinca den un manera cu e ta biniendo na vigor paso pa paso segun iniciado Sneek. Despues cu e ley bin na vigor y tur cos ta oficial, cada casino mester prepara su presupuesto (si nan ta desea di traha un luga separa)  y haci un analisis di  kico e impacto ta bay ta. Casinonan ta haya pues 2 aña pa prepara pero no tin nada riba papel ainda pa duna indicacion cu e periodo aki a inicia. “Aworaki e ta ‘in de lucht’. Asina cu e ley pasa for di parlamento y tur cos bira oficial, e periodo di dos aña di espacio pa casinonan  ta cuminsa.”