Ley di criminalidad hubenil ta aplicabel den Caribe Hulandes entrante 1 di augustus 2020. E maneho pedagogico ta e caracteristica di ley criminal hubenil. Esaki ta nifica cu castigo y medidanan pa hende jong di 12 pa 18 aña di edad tin como meta un impacto positivo riba comportamento, re-educacion y prevencion di recidivismo.

Cu introduccion di ley di criminalidad hubenil, lo tin mas opcion den cadena legal di criminalidad hubenil pa trata comportamento criminal. Elementonan importante den e proceso aki ta inclui reintroduccion di e programa Halt, introduccion di detencion hubenil, coordinacion di orden di servicio comunitario, y supervision di condicionnan special di Reclassering.

Den caso di delitonan menor manera vandalismo, ausencia escolar of core sin rijbewijs, polis por referi e hoben na Halt. E hobennan aki ta ricibi oportunidad pa rectifica nan comportamento criminal. Halt tin como meta stop comportamento transgresivo entre hobennan lo mas trempan posibel, a traves di entrevista, trabou y tareanan educacional, y pidi disculpa na e victima. Si completa e programa Halt exitosamente, e hoben no lo ricibi un record criminal.

Den caso di ofensanan mas serio, manera abuso of un acto di violencia, Servicio di Fiscal Publico lo por dicidi di enhuicia un hoben. Voogdijraad e ora ey lo investiga historia pasado di e hoben y subsecuentemente conseha Fiscal riba ki castigo lo ta mas adecua pa e hoben en cuestion. Corte tin decision final riba ki castigo lo impone.

Corte por duna un boet of detencion hubenil. Detencion hubenil ta un sentencia di prison specificamente pa hende jong cu a comete un ofensa serio. Corte por ademas otorga castigo den forma di un sentencia suspendi. Esaki lo tuma luga bou condicionnan special. Si un hoben comete un crimen di nobo, of no cumpli cu e condicionnan, Corte por dicidi cu mester cera e hoben den detencion hubenil toch. Den detencion, tin reglanan diferente den seccion hubenil. Por ehempel, no por pone menornan di edad den detencion solitario ni tampoco hunto cu adulto. Ademas, tin guia pa hoben tocante actividadnan durante dia, educacion, y bishita.

Condicionnan special cu por pone riba hoben ta por ehempel un orden di servicio comunitario, tratamento obligatorio of un toque de queda (curfew). Reclassering ta coordina orden di servicio comunitario y ta monitor e cumplimento di e hoben pa su condicionnan special. Hopi biaha, tambe ta asigna un consehero Jeugdzorg na e hoben, cu meta pa e hoben keda riba e caminda corecto y sigura cu nan no cay den crimen di nobo. Si esaki ta exitoso, lot a beneficioso tanto pa e hoben como pa comunidad.