Gobierno di Aruba no por ta dirigiendo e crisis di COVID-19 a base di e ley di Calamidad y cu decretonan ministerial, pasobra esaki no ta proporcional ni ta tene cuenta cu derechonan basico hancra den Constitucion. Asina Raad van Advies ta bisa den su analisis di un aña di maneho di e pandemia di COVID-19, particularmente ora ta trata e decisionnan di Gobierno pa limita derechonan fundamental di ciudadanonan.

Desde Maart 13, 2020, Gobierno ta hibando maneho riba e pandemia di COVID-19 basa riba un decreto basa riba articulo 10 di e Ley di Calamidad. Di e forma aki, por a ehecuta algun autoridad special cu cada 72 ora ta haya base legal segun decreto ministerial, unda ta bin cu maneho pa evita peliger pa persona y material.

No ta trahando segun un ley special

Segun cu lunanan tabata pasa, y tabata busca un vacuna, e efectonan socio-economico tabata bira pio y Gobierno mester a sigui mantene e maneho di crisis, basa riba e ley di Calamidad, pero a mira e necesidad pa mara esaki na un base legal specifico. A presenta un concepto di ordenanza nacional cu disposicion a base di consecuencianan di e pandemia COVID-19 y den cuadro di medidanan cu a y mester tuma ainda pa evita peliger pa persona y material, dia 24 di Juni 2020 y Raad van Advies a duna su conseho riba e ley aki.

Otro paisnan den Reino tambe a concipia leynan di emergencia, cu a lanta hopi critica y protesta. E critica pisa tabata riba e impacto di e leynan aki riba derechonan fundamental esencial. Na Hulanda a bin hopi discusion ora cu e ley a keda introduci riba 1 di December 2020. Mescos tabatin discusion na Corsou ora cu a introduci e ley di situacion di excepcion. E discusion riba e limitenan constitucional di leynan di emergencia y con ley derechonan fundamental por keda limita. Esaki ta mishi esencia di estado di derecho.

E concepto di ley di Aruba no a keda presenta na Parlamento y consecuentemente, Raad van Advies no por publica su conseho. Sinembargo, reflexion riba e pregunta di garantianan legal den tempo di pandemia ta na su luga, segun Raad van Advies y como tal, sin lubida e situacion real cu Aruba ta den dje desde Maart 2020, a dicidi pa ilustra e cuadro legal y duna recomendacion.

Decreto Ministerial cada tres dia

Segun Constitucion, ehecucion di autoridad special, entre otro, limitacion di derechonan fundamental ta permisibel den un situacion di excepcion. Entre otro Constitucion ta bisa pa ley mester determina cua ta e derechonan fundamental cu por keda limita si tin caso excepcional y mester mantene siguridad nacional.

Ley di Calamidad ta regla cualifica un situacion di excepcion, esta un desaster. Basa riba articulo 10 di e ley di Calamidad por, lo por unicamente limita e derechonan fundamental si tin un desaster of e miedo pa un desaster y cu esaki mester ta cla pa medio di decreto. Aruba a saca un decreto pa e situacion di COVID-19 na Maart aña pasa cu ainda ta vigente. Den e mesun articulo 10 di e ley di Calamidad sinembargo, ta bisa tambe cu mester hala e ley aki mas lihe aden posibel. Pero desde Maart 13 2020, cada tres dia ta saca decretonan Ministerial pa obliga ciudadanonan pa keda cas, cera servicionan, compania, institucion no-esencial, y institucion di un toque de queda, e asina yama ‘samenscholingsverbod’, limitacion di personanan den cuarentena of isolacion, y medidanan pa limita entrada di biahero.

Pandemia ta un desaster segun ley?

Den cuadro di e bringa e virus por distingui diferente scenario y no tur ta rekeri necesariamente e predicato di desaster. Ademas por haci diferenciacion entre varios fase di tempo, unda ta varia di crisis agudo te cu normalisacion gradual. E prome fase den cua Aruba a haya memey di Maart 2020 tabata uno unda mester a tuma medidanan mas posibel y aplicacion di e ley di Calamidad tabata na prome instante e caminda cu a tuma. Danki na e pasonan tuma, tabata relativamente exitoso den evita cu e virus a plama, Segun lunanan a pasa, a bin un normalisacion. Aunke cu mester reconoce cu ainda tin un situacion excepcional, e pregunta sinembargo ta si mester papia di un desaster. manera ta menciona den e ley di Calamidad.

Segun Raad van Advies, mester evita cu ta uza e termino desaster na forma incorecto. Ta crea un situacion unda e autoridad special pa un situacion di desaster no ta cuadra pa exigencia di proporcionalidad y subsidaridad, unda por ehempel ta uza un cañon pa mata un sangura.

Pa un situacion cu ta dura largo manera e pandemia, mester di un base huridico mas robusto cu ta ekipa cu mas garantia.

Articulo 1 di e ley di Calamidad ta defini un desaster como un hecho cu ta conduci na asina un kiebro den siguridad nacional di forma cu bida y salud di hopi ciudadano y interes material ta menasa, y cu mester di un accion coordina di servicionan publico y organisacionnan riba diferente experticio.

Garantianan legal

E limitacion pa cada derecho fundamental unda no por sali di locual Constitucion ta considera e maximo, mester ta bon describi pa asina nan por cumpli cu e exigencia di ta previsibel manera ta ilustra den hurisprudencia di e Corte Europeo pa Derechonan Humano. E principio di legalidad ta encera cu un bon base pa kibra den e derechonan fundamental ta leynan nacional, cu esakinan mester ta accesibel y cu por anticipa e efectonan suficientemente. No solamente e ta di importancia pa regla e limitacion di derechonan den un ley formal, pero segun Raad van Advies, e ley mester ta di calidad tambe. E limitacion den derecho mester ta detaya.

Aunke cu por defende un apoderacion general pa un corto duracion (maximo 72 ora) den un situacion di emergencia inespera, e ta importante, segun cu e crisis ta sigui cu su impacto riba derechonan fundamental, pa describi e limitacion di libertad mas cauteloso posibel.

Si circunstancianan, riba cierto momento ta exigi den cuadro di un lucha efectivo contra e virus, mester tin mas medida cu ta limita derechonan fundamental, anto mester motiva e necesidad pa esaki na un forma adecuado. Sigur si ta trata di medidanan di largo duracion, cu ta rekeri un sosten amplio mester tin un bon comunicacion cu ciudadanonan, unda Gobierno ta clarifica cua ta e argumento y escogencia ta haci pa su maneho.

E limitacion di derecho cu ta haya necesario y ta conta pa un periodo largo mester tin su base riba por lo menos un lbham, esta un decreto nacional cu medida general (landsbesluit houdende algemene maatregelen).

E decreto Ministerial ta pa detayenan administrativo cu rekeri cambionan regular, y no ta pa limita libertad di ciudadano pa largo. Ademas un lbham ta contene mas garantia, manera opinion di Raad van Advies y ta di un legitimidad democratico mas halto.

Mester tin proporcionalidad

Garantia pa proporcionalidad mester ta mas elabora pa cada decision cu por limita derecho fundamental. consecuentemente mester tene cuenta cu eliminacion gradual di e medidanan. E necesidad pa e autoridadnan aki rekeri un debate mas amplio unda diferente interes, constitucional y otro punto di bista mester ta inclui.

E garantianan pa un legitimidad democratico mester ta mas elabora, y no ta suficiente cu ta unicamente informa Parlamento di areglonan cu ya ta na nan luga.

E hecho cu e situacion actual ta uno temporario mester determina tambe cua ta e medidanan cu mester tuma. Aunke cu no ta semper posibel pa sa con un situacion ta desaroya, e medidanan ta asina impactante pa ciudadano y companianan, nan no por dura mas cu locual ta absolutamente necesario.

Tres opcion

Despues di un analisis profundo di e situacion real tin tres opcion dilanti man, segun Raad van Advies. Gobierno ta determina con ley e uzo di instrumento legal regular por uza, manera e Landsverordening infectieziekten of e Algemene Politieverordening. Si nan no ta suficiente, por amplia nan.

E di dos opcion ta cu ta keda maneha e situacion a base di e ley di Calamidad, pero ta ahusta esaki pa medio di un base legal mas fuerte pa e autoridadnan special, por ehempel pa medio di un lbham y no un decreto Ministerial.

E di tres opcion ta un ley di emergencia nobo dirigi na situacionnan excepcional cu no ta un desaster, pero cu ta di duracion mas largo. Por uza e ley di Calamidad como ehempel pa e ley nobo aki, cu ta duna mandatarionan espacio pa actua mas flexibel. Pero e flexibilidad aki no ta sin limite y mester keda den un cierto cuadro, esta esun di un estado di derecho y cu respet pa derechonan fundamental di cada uno.

Uno cu tres

Raad van Advies ta urgi Gobierno pa yega na e areglo aki, specificamente pa considera opcionnan uno y tres. E organo di consulta mes ta kere den un combinacion di e dos opcionnan aki, y ta conseha un adaptacion di e ley di Calamidad.

Den un situacion di crisis agudo cu Gobierno a keda confronta cune na Maart y April 2020, tabata aceptabel te na cierto nivel, cu ta impone limitacion di derechonan fundamental a base di un decreto ministerial cu por control democratico. Pero segun cu e crisis ta sigui, y cu tin un normal nobo, e manera actual di dirigi den un periodo asina ta menos aceptabel.

Gobierno mester realisa cu garantianan legal, netamente den tempo insigur, unda tin retonan grandi, den tempo di pandemia, ta keda e guia y como tal, mester tuma nan na consideracion.