Despues cu 1 di december ultimo, Minister di Asunto Economico, Comunicacion y Desaroyo Sostenibel, mr. Geoffrey Wever a inaugura Aruba Fair Trade Authority (AFTA) na Oranjestraat 28, den centro di Oranjestad; januari 1, 2024 e Ley di Aruba Fair Trade Authority (AFTA) tambe a drenta na vigor pa asina AFTA por inicia su tareanan.
Aruba Fair Trade Authority, como un organisacion independiente (zelfstandig bestuursorgaan) tin su mesun directiva. AFTA tin e tarea principal di e ehecucion di e ley di ordenansa nacional encuanto competencia husto (mededingingsverordening).
E meta di e ordenansa nacional di competencia husto ta pa garantisa un desaroyo economico husto y stipula regla encuanto acuerdonan cu ta limita competencia (mededingingsafspraken) y posicion di poder (machtspositie), como tambe stipula regla pa cu supervision riba concentracion di empresanan.
Fin di Januari Minister Wever lo ehecuta un biahe importante pa Hulanda pa reuni cu expertonan Hulandes pa inicia cu e preparacionnan di ley pa inclui e proteccion di consumidor bou di AFTA su responsabilidadnan, den cuadro cu e landspakket. Asina AFTA lo ta responsabel no solamente pa lo cual ta stimula competencia husto den nos mercado, pero tambe lo contribui na proteha nan consumidornan contra practicanan inhusto den comercio, y educa nan riba nan derechonan. Intencion ta cu pa 2025 AFTA lo tin e responsabilidad adicional pa regula y informa riba tereno di proteccion di consumidor.
Pa mas informacion tocante e responsabilidadnan y tareanan di Aruba Fair Trade Authority (AFTA) por bishita nan webiste www.afta.aw
