Fondo Desaroyo Aruba (FDA) ta un fondo cu a wordo crea casi dos decada pasa entre Hulanda y Aruba y cu a duna su contribucion pa financia proyectonan importante pa nos isla.
Pero practicamente FDA cu menos pena cu gloria a conoce su final caba. Minister di Economia, Richard Arends a declara na Bon Dia Aruba cu intencion ta pa duna e fondo aki otro bida, pero sin sosten di Hulanda, locual e mandatario ta lamenta.
E ta haya cu e formula di FDA a traha ‘fantasticamente’. Sinembargo na Hulanda no tin interes politico pa sigui cu ne. P’esey awe dialuna gobierno tin plania pa presente e ley den parlamento pa determina kico lo sosode cu e suma cu a resta di FDA . E no sa e suma exacto pero e lo ta alrededor di 13 miyon florin. Intencion di e ley aki ta pa traha un protocol hunto cu Hulanda riba con nan lo bay aloca e fondo, ya sea riba tereno di educacion, husticia, desaroyo sostenibel, etc.. E formula cu FDA opera tabata cu e fondo aki a wordo crea pa Hulanda y Aruba, caminda ambos pais di reino tabata contribui. E tabatin un presidente y e fondo tabata wordo administra pa banco AIB.
