A3 proyecto gezonde scholen michelle winklaar (NP).jpg
Michelle Hooyboer Winklaar, Minister di Enseñansa

E ley cu ta regla e financiamento di estudio pa studiantenan lo drenta na vigor 1 juni. Tin cambionan grandi den e Landsbesluit voorwaarden studieleningen aki.

 Esaki ta informacion cu nos a ricibi di Ministerio di Enseñansa.

E ley ta conta pa tur studiante existente, tur ex-studiante cu un debe actual di Arubalening y tambe tur studiante nobo. Den e tabla riba e pagina aki por haya e cambionan unda por mira cu e interes a baha pa 2% y cu esaki lo cuminsa core na momento cu e studiante cuminsa paga bek e suma.

Otro cambionan importante ta cu e periodo pa page e debe bek a cambia di 15 pa 20 aña. Tin e flexibilidad pa paga bek mas pa luna pa caba cu e debe den menos tempo of por scoge pa paga menos pa un periodo mas largo.

Criterionan pa fia
E edad maximo pa bin na remarca pa Arubalening semper tabata stipula na 30 aña. Awo goierno ta haci’e posibel pa personanan te cu 35 aña  por aplica y bin na remarca pa un Arubalening.  Den caso cu esaki ta pa studia na un di nos institutonan local cu ta wordo reconoci pa ley.

Antes no tabata tin un producto di Arubalening apart pa Masteropleiding. Awo a crea un opcion pa financiamento di estudio pa un Masteropleiding te na un maximo di 42.000 florin.

E suma maximo pa Merca y Canada a subi di  102.000 florin pa 140.000 florin. Tur esaki ta parti di e maneho pa haci studiamento na Merca y Canada mas accesibel pa nos studiante, segun e ministerio. Banda di condicionnan di nacionalidad e studiante mester demostra cu e tin un minimo di 5 aña inscribi na Censo como ciudadano biba na Aruba. Pa studiantenan Arubiano cu ya ta den exterior a haci’e posibel cu nan por aplica pa bin na remarca pa un fiansa pa haci un Masteropleiding. Sinembargo nan no por tin mas cu 7 aña inscribi na un censo pafo di Aruba.