Parlamento a aproba e ley iniciativa di lider di fraccion Marlon Sneek (AVP) pa cambia e Warenverordening cu ta regla e calidad di alimentacion y otro producto y control di higiena. Asina departamento di Salud por actua miho contra entre otro supermercadonan cu ta bende productonan venci.
E 12 miembro di su fraccion a aproba e cambio di ley ayera. Motibonan ta pa garantisa e calidad di cuminda y bebemento, segun sr. Sneek, y asina proteha e salud di comunidad. Awor e problema di hopi producto bo no sa di unda nan ta bin, con bieu nan ta y si nan ta den bon condicion.
E departamento di Higiena ta haci control pero ora ta topa cu productonan venci, nan no por kita e productonan aki si e verpakking di nan ainda ta intacto. Y nan ta topa cu productonan cu hasta ta e fecha ta caduca pa añanan. Pero nan no mag di mishi cu e producto, asina minister di Salud Publico, Alex Schwengle ta splica parlamento ayera. Cu e cambio di e ley e departamento aki si por actua. E ta duna nan mas posibilidad segun e minister: “Pa nos identifica productonan cu no ta bon y elimina nan for di cadena di comemento y bebemento . Productonan cu no ta bon ta relata cu hopi malesa entre otro cancer di tripa. Pues ta importante pa proteha consumido. E ta duna departamento salud un tool extra pa haci nan trabou debidamente.”
Tambe e ta dificil pa actua ora tin un recall di productonan. Pasobra hopi biaha e bendedonan ta kita e serial number anto e ora bo no sa cua producto e ta, segun e minister. E ta bisa cu nan tambe tin e plan casi cla pa extra personal pa haci control. Esaki ta duna nan capacidad suficiente pa haci e trabou. Mester bin cu un opleiding extra si pa e personal, e ta splica. Mita di 2018 e ta spera cu e personal extra cu lo cuminsa ehecuta e adaptacionnan di ley.
E cambionan ta encera entre otro cu no por haci promocion pa productonan cu no ta bon. No por bende productonan sin nan verpakking y of etiket (label) original. E bendedo mester añadi informacion na Hulandes, Ingles y of Spaño den e caso no ta cla si di unda e producto ta bin, ken a importa of ken a trece riba mercado. No ta permiti pa cambia e label, cambia e verpakking sin motibo valido. No mag di cambia e fecha of estado di e producto.
Bon Dia Aruba ta lesa den e ley cu Conseho di Consulta (Raad van Advies) no a duna un conseho positivo riba e ley aki. Entre otro nan ta sugeri pa cambia e Warenverordening cumpleto pa asina por cumpli cu e normanan internacional di awendia pa siguridad di alimentacion y tambe pa tin instrumentonan nobo pa controla.
