Despues di mas cu 10 aña unda gobierno a cuminsa cu e trayecto pa regla crèche, ayera nan a yega un logro grandi cu e ley di Kinderopvang, aproba unanimamente den parlamento. Centronan di cuido awor mester di un permiso pa opera.
Desde 1996 tabatin un concepto di ley caba, pero aña pasa a entrega e concepto finalmente na parlamento. Minister di Enseñansa Michelle Hooyboer- Winklaar ta informa cu tin fasenan transitorio pa e rekisitonan pa asina e centronan di cuido existente por haya suficiente tempo pa adapta. Por ehempel un exigencia ta cu lo limita e cantidad di mucha pa begeleider:
Articulo 13
- max 6 mucha entre edad 6 siman te 1 aña
- max 10 mucha entre edad 1 te 2 aña;
- max 12 mucha entre 2 aña te cu 3 aña;
- max 13 mucha entre 3 aña te cu 4 aña;
Si ta trata di grupo di edad mixto, e ta e averahe di e dos categoria, segun e minister.
Gobierno lo stipula un fecha cu e ley lo drenta na vigor. Esaki ta premira entre 6 pa 12 luna y pa e diferente exigencianan di calidad lo stipula periodonan di transito. Un ehempel ta cu lo duna un periodo di transito di dos aña pa e ratio, esta e cantidad di mucha per begeleider. Lo traha hunto cu Fundacion Pa Nos Muchanan y e Centronan pa trece tur informacion necesario cerca di e centronan.
Prijsnan di cuido
“A tene cuenta cu e aspecto cu cualkier exigencia di ley demasiado pisa of rapido por causa un impacto riba prijs, y pa esaki e punto di salida di e ley tabata pa haci den fase, cu exigencianan logico y rasonabel, y dunando un periodo di tempo amplio pa por cumpli cu tur rekisito. Tur esaki cu enfasis riba calidad y siguridad di nos muchanan”, minister Hooyboer-Winklaar ta splica.
Esaki ta un di puntonan cu Rosalin Kock a trece dilanti aña pasa den un encuentro cu doñonan di e centronan di cuido riba e concepto di ley. Sra. Kock cu den cuadro di su estudio a haci un investigacion, a remarca cu e ley siguramente ta necesario. Pero cu e ley ta solamente e comienso. Pasobra e ley ta duna e centronan di cuido hopi mas trabou, segun e, mientras nan tin nan man yen caba y hopi biaha ta traha cu tiki personal pa asina mantene e prijsnan abou. Sra. Kock e ora a boga pa un sosten financiero di banda di gobierno, manera tin den otro paisnan. Na Aruba gobierno ya ta subsidia Traimerdia. Segun sra. Kock e ta hopi importante pa e crèchenan ta keda pagabel pasobra tin hopi famia cu ta gana e sueldo minimo. “Nan tambe mester haya e oportunidad pa por manda nan yiu pa un centro di cuido bon”, asina el a bisa den un entrevista aña pasa cu nos.
Den parlamento tabatin atencion pa e punto aki, como cu e fraccion di AVP a entrega un mocion cual tur fraccion tambe a sostene. E mocion ta encera pa haci un estudio di posibilidadnan di co-financiamento (subsidio directo, reduccion fiscal) via gobierno y doñonan di trabou.
Educacion minimo
Un otro aspecto importante di e ley ta cu lo bin exigencianan pa e begeleidernan di e muchanan pa nan educacion. E nivel di enseñansa minimo cu esunnan cu ta traha den un centro mester tin (LBO). Gobierno lo bin cu e programa di training pa esunnan cu ta traha den e centronan pa ofrece opleiding di LBO pa tur cu ainda no tin diploma. Den e training aki lo tene cuenta cu e experencia cu e lidernan tin y cu e competencianan cu nan a adkiri den nan trabou, segun e ministerio di Enseñansa. Tambe nan mester un bewijs di bon conducta pa asina evita cu personanan cu strafkaart lo traha den e centronan. E ley tambe \ ta bin cu rekisitonan pa siguridad y higiena.
