Awor cu e ley di regula all-inclusive ta un echo, ta necesario wak dilanti con bida ta sigui. Esey ta conta pa tur e actornan de turismo, independiente di cual banda nan a scoge den e conflicto cu e ley a resulta di ta. Na nos opinion, e problema no a termina, pero apenas a cuminsa. Ta inimaginabel cu e oposicion di parti di e sector hotelero ta keda sinta keto despues di e bataya perdi ayera. Un opcion cu ta contemplando caba ta e posibilidad huridico cu no ta un caminda facil cu ademas ta bay tuma bastante tempo. No ta e idea pa aki bay specula riba e resultado. Loke ta interesante ta mas bien con turismo ta bay move den e siguiente añanan, cu e ley nobo vigente y den ehecucion.
Kico por ehemplo a corto plaso e efectonan di e ley? Ta obvio, cu introduccion di e ley, cu e interes pa compra di hotel riba e strip di Palm Beach pa converti den all-inclusive lo bira menos. Esey ta probablemente e unico bentaha cu nos por mira awor aki. Pero e prohibicion no ta conta pa e proyectonan cu a haya aprobacion caba y cu ta contempla den e 1500 camber extra cu ta bay expande e sector di all-inclusive considerablemente. Pero e asunto no a termina aki. Un di e preguntanan clave ta con ta bay implementa e ley, no solamente pa e control riba e hotelnan, sino tambe e control riba e sector di acomodacion alternativo.
Aunke ministro encarga cu turismo a haya un cierto autoridad pa loke ta otorgamento di permiso pa all-inclusive, e no tin un aparato di control. Ta e otro ministro, di Salubridad Publico, ta esun cu tin un aparato di control bao di e ley. Pero e aparato ey no ta pa haci control administrativo financiero, sino solamente aspecto di higiena, etc. Ministerio di turismo por pone hende pa administra e peticionnan pa permiso all-inclusive, dirigi na e ministro, pero no tin autoridad pa haci control y eherce supervision den e hotelnan cu no ta all-inclusive, pa haya sa si nan ta cumpli cu e criterionan estableci pa e corelacion di all-inclusive y otro areglo. Manera control en general gubernamental den supervisa ta bay te awor, por anticipa cu lo dura basta tempo prome cu e control yega na e hotelnan.
Loke a lanta bastante asombro den henter e asunto ta e carta cu AHATA a manda pa Prome Ministro. Pa cuminsa e propuesta cu ta haci den e carta ta mustra straño, pasobra con bo por garantisa un cierto suma (Afl. 35 miyon) lo resta di e placa cu e diferente impuestonan ta trece aden pa ATA. Esaki ta nonsense pasobra ATA mester inverti loke mester inverti den mercadeo pa Aruba, y ademas hiba un maneho sobrio, sin gasto excesivo den e organisacion. Loke e ora resta fin di aña, a resta. Garantia di cierto suma ta ridiculo.
Di otro banda, e gritonan di e ministro encarga cu turismo cu ta trata di soborno, ta di mesun nivel pesimo cu e propuesta di AHATA. Acusa otro di acto di desesperacion mutuamente por tin un elemento di berdad pero no ta yuda den discusion sano, algo cu ta haci hopi falta den parlamento.
Pero mas cu tur cos, awor nos mester purba imagina ken ta esnan cu a sali mas beneficia den henter e asunto aki. Esey no ta e sector hotelero cu no ta maneha all-inclusive, pero sa practica e alternativa aki den tempo malo. Nan a keda limita den nan posibilidad di actua na beneficio di nan negoshi, un derecho legitimo di empresario. E sector creciente di otro acomodacion no a keda afecta, pasobra nan ta ni considera den e aspecto aki.
Esnan cu si ta beneficia ta e hotelnan cu ya caba ta all-inclusive, cu a para mira, probablemente cu satisfaccion con, cu un demanda creciente di all-inclusive mundialmente, e ministro di turismo a dal e porta cera den cara di e hotelnan cu no ta all-inclusive, kitando no solamente e posibilidad pa bira all-inclusive, sino tambe, manera bisa caba, kitando e posibilidad di mantene rentabilidad riba un cierto nivel uzando all-inclusive combina cu otro areglo. Ironicamente tur esaki a tuma luga, demonisando e sector cu awor a sali mas beneficia, pasobra nan tabata paden prome cu e porta a cera.
Por anticipa anto cu loke ta bay tuma luga ta un competencia desleal na fabor di esnan all-inclusive caba, cu tur consecuencia pa e mercado hotelero. Lider di fraccion gubernamental ayera den e reunion a bisa repetidamente cu e ley aki ta pa ‘regula’ y den cierto forma el a regula algo tambe. Cuidao cu mas oro, ta bin e peticion di e sector all-inclusive pa por extende nan cantidad di camber, pasobra nan tin un grado asina halto di ocupacion cu nan kier probecha esaki. Nos ta keda cu e impresion cu e plan pa ehecuta e ley aki no a nace den mente di e ministro aki, pero ta parce un accion bon pensa di parti di e sector hotelero.
