Awe parlamento ta trata e conflictivo ley tocante hotel all-inclusive. Independiente di e resultado, ta keda e asunto cu ministro encarga cu turismo ta violando Constitucion di Aruba, nengando di duna parlamento e famoso rapport cu Price Waterhouse Coopers a traha riba e tema aki. E ministro ta alega cu e rapport ta ‘inconclusive’, sin splica drechi ta kico e kiermen cu esey. Y sin splica tambe pakico anto e mes a cuminsa cu menciona e rapport aki den su proyecto di ley. Es mas, e rapport aki segun e mes tabata forma e base pa e ley di cual ta papiando. For di e Memoria Splicativo nos ta cita:” Seguidamente a duna Price Waterhouse Coopers e encargo pa haci e investigacion pidi (pa Parlamento, red.). E rapport aki a keda ofreci na Ministro dia 26 di januari 2016. E resultadonan di esaki a forma e base pa e proyecto di ley aki. Den esaki (e rapport, red.) ta propone pa incorpora den e Decreto di permiso un sistema special di permiso pa hotel cu ta ofrece acomodacion all-inclusive.”
Pa tur claridad: ministro mes ta referi den e Memoria na un mocion aproba den parlamento dia 7 di mei 2015, den cual ta pidi e ministro pa haci investigacion encuanto introduccion di un sistema di permiso pa hotel all-inclusive y encuanto e efecto cu un sistema di permiso asina por tin riba economia di Aruba. Pa nos comprende bon: e ministro mes ta bisa den e Memoria cu e ta honra un mocion di Parlamento, ta laga traha e rapport, uza esaki como pieza clave den su proyecto di ley… pa despues bisa parlamento abierta y frescamente cu nan no ta haya e documento aki! Conociendo actitud di e ministro cu nunca tin miedo pa expresa soberbia ni arogancia, esaki sin embargo a gana premio mayor.
Pa comprende bon kico e ministro aki ta haciendo na daño na nos sistema democratico, nos ta bolbe un rato na e texto di nos Constitucion encuanto derecho di parlamento y parlamentario pa haci pregunta y haya contesta. Articulo III. 17 di Constitucion di Aruba ta bisa:”Cada miembro di Parlamento tin e derecho di haci pregunta na e ministronan. E ministronan ta contesta e preguntanan dentro di un termino rasonabel, asina leu cu contesta esakinan no ta ser considera en pugna cu interes di e pais o di Reino.” Den e splicacion cu ta acompaña e texto ta elabora riba e derecho di cada miembro individual pa puntra y haya contesta. Pues no ta un mayoria di Parlamento so por haci pregunta y e ministro tin obligacion pa contesta. Den e caso aki e pregunta tabata si nan por a haya e rapport di PWC riba cual e ministro ta basa su proyecto di ley. Asina leu cu nos por comprende di e ministro e no kier duna e documento pasobra, manera nos a bisa caba, e ta “inconclusive”.
Esey naturalmente no ta un contesta valido. Si e no kier duna e documento, e mester argumenta ta cual interes nacional o di Reino ta na peligro si e duna parlamento e documento aki. Si e no tin tal tipo di argumento, y nos ta duda cu e tin pasobra si e tabatin e lo a menciona esey caba, anto e mester cumpli y duna parlamento e documento. E no por actua manera tata o padrino di parlamento y dicidi pa nan kico nan por lesa. Si e no ta cumpli, anto ta na su lugar pa parlamento tuma paso contra e ministro, di e forma cu nan ta considera apropia. Esaki por ta un mocion di desaprobacion o un mocion di desconfiansa. Sin tuma na cuenta cu ta trata di parlamentario di oposicion o di fraccion cu ta sostene gobierno, e caso aki ta marca un linea historico pa parlamento, cu ta bay tin repercusion pa hopi aña.
Si fraccion di gobierno ta keda sin actua contra e ministro, lo ta interesante pa sa kico nan ta bay haci ora den futuro un gobierno cu nan no ta apoya, ta tuma e mesun actitud di soberbia aki contra nan y ta nenga nan documento cu e argumento aki:”Boso ta corda con dia 19 di augustus 2016 boso ministro encarga cu turismo tabata nenga abiertamente pa duna parlamento e documento riba cual e mes ta bisa cu el a basa su ley? Boso no a apoya niun hende pa purba coregi actitud di e ministro aki, pasobra manera boso por a bisa, ‘he is a S.O.B. but he is our S.O.B…’ Wel, awor nos tambe a cria e mal custumber aki di bisa un parlamentario den su cara cu e no ta haya e documento y cu e sa masha bon cu e no por bay hues pasobra hues ta mande bek cerca parlamento, unda nos tin un mayoria…”
Wega di poder ta dushi tanten bo tin poder, pero ta yega un dia cu bo no tin e mas. Ta p’esey ta importante cu, sin importa di cual partido bo ta, tin momento cu den parlamento mester actua na interes di parlamento mes. Esaki ta un momento asina.
