“E ley cu nos tin actualmente no ta sirbi pasobra simplemente bo no ta haya e solucion,” Sra. Grislynn Hernandez ta bisa Bon Dia Aruba. Sra. Hernandez, mama di un mucha di 10 aña cu recientemente lo a wordo mishi cu ne pa motibo di un pastoor, ta bisa cu door cu husticia ta tarda y tin biaha djis no ta yega nunca, ta bay start cu accion di firma y yega parlamento cu un cantidad grandi di firma pa wak si por haya un ahustacion of cambio den e ley di abuso contra menor.
E tema di abuso contra menor ta keda bini pa dilanti cu aworaki un otro acusacion. E biaha aki contra e pastoor J.S. acusa di mishi cu parti intimo di e yiu di Hernandez, un mucha muhe di 10 aña. E criatura lo a bisa Hernandez, kende a graba su declaracion cu su telefon y entrega denuncia na polis. E iniciativa aki pa bay cuminsa colecta firma a start door di sr. Jairo Maduro y sr. Eromil cual ta dos tata di famia cu kier a haci e accion di firma aki. Esaki ta pasobra e problematica contra abuso di menor na Aruba ta algo cu ta preocupa nan hopi. Sra. Hernandez ta bisa: “Ami a bisa nan cu mi ta duna nan un man como mayor. Na caminda cu e cos ki a pasa, e la touch ami personal, logicamente mi ta bay profundo den esaki,” Diadomingo 4 di December na Disney Recreational na St. Cruz nan lo ta presente pa acepta firma y sra. Hernandez kier a afirma cu esaki no ta cuestion di politica. “Si un hende bin acerca bo cu intencion politico, e no tin validez pa mi tampoco. Pasobra bo no ta haciendo e pa e muchanan den e caso aki, bo ta haciendo e pa motibonan politico.”
Cambio den ley
Esaki no lo ta e prome biaha cu ta bay start cu un accion di firma mirando cu den pasado, fundacion contra abuso di mucha di Sra. Lisette Gomez a colecta mas cu 10.000 firma pa e mesun causa y keto bay nada no a wordo cambia den ley ainda.
“Tur mayornan mester papia, alerta nan yiu y famia. Mester busca e rais di e problema. Tin medionan di prensa cu ta tapa pa e tipo di personahenan akinan pasobra porta nan ta famoso of tin cierto beneficio, e cosnan aki mester stop,” Sra. Hernandez ta bisa. Sr. Reginald Danies, kende tambe ainda ta riba su lucha pa purba trece cambio den e ley di abuso contra menor, ta splica Bon Dia Aruba cu recientemente el a entrega un carta na fiscal. “Den e carta, mi ta pidi fiscal pa hinca man den e abuso di mucha cu ta pasando na Aruba. Mi a haya un afspraak cu ne hunto cu fiscal mayor pa wak con nos por cuminsa gara pedofil,” Sr. Danies ta splica Bon Dia Aruba. Awendia, e mama tin cu sali of e mucha tin cu spanta pa e caso cana su caminda apropiadamente. Segun Sr. Danies, un di su sugerencianan ta pa maestronan di scol, directornan di scol como tambe na traimerdia mester haya e forsa y autoridad pa manda un mucha directamente na un psicologo di mucha.
“Unbes cu Kinderpsycholoog traha cu scol y trahado social di scol, nos ta bay cuminsa mira 5 pa 6 pedofil ta cay pa luna,” Sr. Danies ta bisa. Bon Dia Aruba ta purbando di tuma contacto cu instancianan concerni manera entre otro Bureau Sostenemi pa bay un tiki mas leu en cuanto pakico e casonan aki ta sigui bin pa dilanti y pa decadanan ainda no a introduci un solucion productivo.
Peticion
Pa esunnan cu ta interesa den firma e peticion aki, por yama na 742 1934 of 737 5500 y nan mes ta trece e formulario pa bo firma. Tambe bo por haya un formulario di bo mes cu bo por colecta firma den bo famia of bario, djis yama y nan mes lo bini cerca bo.
