Recientemente Lex de Ridder, Chief Commercial Officer di Aruba Ports Authority, tabatin e presentacion di e Masterplan pa desaroyo nobo riba e tereno di waf na Oranjestad na su encargo na e Cruise Symposium Aruba y a duna di conoce cu den e proximo dos luna, lo trece dilanti e propuesta completo na esunnan concerni y publico en general. Teniendo na cuenta aspectonan importante manera kico ta loke producto Aruba tin mester y por sostene, ta buscando e mescla corecto pa trece un dinamica nobo na e area di waf.
Ta trata di 20 hectarea di tereno, di cual ta propone pa 40% ta destina como parke y areanan berde, 10% ta espacio publico pa cana, sinta y move y 50% lo ta propiedad inmobiliario cu diferente uzo. E ultimo aki lo mester sigui guidelines stipula di Aruba Ports Authority, cu ta dicta grandura y estilo, entre otro. Sr. de Ridder a splica tambe cu a acerca esunnan encarga cu proyecto di Bushiri Beach y cu e propietario nobo di MarAzul pa yega na un cooperacion cu lo maximalisa e atractivo di e waf di Oranjestad pa e industria crucero.
Sr. de Ridder a papia den su presentacion tambe riba e importancia di keda ‘on track’ den e proyecto cu lo tuma entre 10 pa 15 aña pa keda completa. “Na prome luga ta importante pa bin cu un plan pa sa unda bo ta bay, pero tambe cu bo ta desaroya e hermentnan cu otro desaroyo nan mester sigui pa keda riba mesun liña”, asina e ehecutivo a splica. “Nos ta trahando riba tur esey pa tin un ehecucion responsabel cu Gobierno y APA por dirigi, cual ta hopi importante den henter e maneho.”
Aruba Tourism Authority tambe ta forma parti di e socionan cu APA ta traha di cerca cu nan pa asina inclui e vision cu tin pa Aruba mantene su mes como un di e destino nan mas gusta den Caribe pa e liñanan di crucero y haci e experiencia pa e turista, uno cada bes mas agradabel y unico.
