E prome audiencia di huicio politico teni pa democratanan den congreso a bira hostil na momento cu nan unico testigo, ex- manager di campaña di Trump, Corey Lewandowski a nenga di contesta cantidad di nan pregunta y a declara cu nan tabata ‘enfocando riba politica personal y sin importancia’.
Lewandowski, un amigo y sostenedo di presidente Donald Trump, a sigui orden di Cas Blanco di no discuti combersacionnan cu e presidente mas leu di locual ya a bira publico den e reporte di consehero special, Robert Mueller. Trump a dun’e animo mientras e tabata testigua, mandando un tweet cu a yama declaracion di apertura di Lewandowski ‘bunita’.
E audiencia ta subraya locual ta un dilema central pa e Comite Hudicial di Congreso henter aña mientras nan ta investiga – y potencialmente cuminsa un huicio politico contra – Trump. Hopi di e sostenedonan democrata kier pa nan move rapidamente pa retira Trump di e presidentcia. Pero Cas Blanco a blokia nan peticion pa supervision casi cada biaha, nengando di duna documentonan nobo of permiti asociadonan testigua.
Ayera, Lewandowski, kende ta considerando pa postula su mes pa senado na New Hampshire, a laga bon cla cu e no lo haci bida facil pa e democratanan. El a exigi nan dun’e un copia di reporte di Mueller, mandando staf core pa busca un. El a lesa directamente for di e reporte y a pidi e democratanan lesa algun parti p’e, mustrando cu e no lo bisa mas di locual Mueller a skirbi. Republicanonan a forsa un serie di votonan di procedura, mandando e audiencia den desordo.
Lewandowski tabata un figura central den reporte di Mueller, cual e comite ta examinando como parti di nan investigacion di huicio politico.
Democratanan ta bisa cu e audiencia televista ta pa educa pueblo Mericano riba reporte di Mueller y locual nan ta bisa ta mal conducta di e presidente.
Dos otro testigo kende a wordo yama pa testigua hunto cu Lewandowski, Dearborn y ex- adhunto di Cas Blanco, Rob Porter, no a presenta, bou orden di Cas Blanco. Cas Blanco ta bisa cu ex adhuntonan ta ‘absolutamente immuun’ di testigua.
Futuro di Lewandowski a pasa den e procedura, cu a ofrec’e un plataforma riba cual defende Trump y presenta su mes riba escenario politico congresional. Un encuesta siman pasa a mustra cu Lewandowski lo gana e nominacion republicano pa senado na New Hampshire.
