Conocido musico Curasoleño, Levi Silvanie ta trece su proyecto The School Tour y The Album Experience listening sessions na Aruba otro siman, pa asina pueblo di Aruba por inspira pa tene combersacionnan habri tocante salud mental a traves di musica.
Dialuna 16 di october di 7’or pa 9’or di anochi, Silvanie ta bay presenta un sesion special pa hende homber, diamars anochi mesun ora un sesion pa educadornan, y por ultimo diaranson tambe ta bay tin un Open Panel Discussion den cual ta bay tin expertonan cu ta bay tene dialogo tocante e topico importante aki. Tur sesion aki ta bay tuma luga na JFK Education Center.
Cu The School Tour y The Album Experience, Silvanie kier usa e poder di musica pa inicia combersacion habri tocante salud mental y cuido personal. Un experiencia inmersivo den cual e ta comparti su musica y su storia, incluyendo dialogo abierto cu profesionalnan di cuido (mental) local. Papiando di obstaculonan diario y e diferente maneranan cu por mehora of mantene un estado mental saludabel.
E prome sesion dialuna 16 di october ta bay ta dedica completamente na hende homber, cu Silvanie como anfitrion y psicologo Johnny Boekhoudt y tambe artista local Ataniro como invitado special.
Pa diamars 17 di october, Silvanie ta yama tur educador, entre otro tur maestro y mayor, bonbini na JFK Education Center pa un sesion dedica special na nan.
Finalmente ariba diaranson 18 di october lo tuma luga un Open Panel Discussion. Ariba e anochi aki pueblo henter ta bon bini pa atende y scucha un panel di diferente representante di partidonan clave cu lo discuti obstaculonan y solucionnan relata na Salud Mental na Aruba.
The School Tour’ ta back!
Despues di un piloto exitoso na april di 2022, The School Tour ta bolbe Aruba otro siman. Ariba e maintanan di dia 16, 17, y 18 di october ta bay tin sesionnan special pa hoben di scol secundario. Akinan ta conta participacion di Filomena Collega, Maria College y Colegio Arubano, cu 100 mucha cada mainta. Ya caba ta planea pa expande e proyecto otro aña pa asina tur scol por haya oportunidad pa participa. E proyecto ta conta cu sosten di Gobierno di Aruba.
Un den cada cuatro persona ta experiencia problema cu salud mental of un enfermedad mental. Mita di tur caso ta cuminsa na of prome cu edad di 14 aña, y suicidio pa motibo di depresion ta e di 4 causa di morto mas comun den esnan entre 15 cu 29 aña di edad. Den nos comunidad, problema cu salud mental masha poco ta reconoci of papia, y hopi bes ta ser mira manera un berguensa. Esaki por descurasha hende di papia tocante nan salud mental of busca ayudo.
Dos siman pasa, Levi a guia un serie di ‘Album Experience’ listening sessions pa Mental Health Caribbean riba e isla di Boneiro, haciendo sesionnan pa pashent, e team di MHC y diferente otro profesionalnan di cuido mental di e isla. E sesionnan aki a mustra di tin un impacto positivo dentro di e organisacion, yudando algun di e individuonan mas reserva pa mustra mas habri dilanti nan compañeronan. Awor Levi ta continua pa e School Tour, empoderando e generacion mas hoben pa tene combersacionnan tocante saludo mental y cuido personal na bida.
