Mientras cu recientemente a elimina algun medida di restriccion pa preveni transmision di e virus SARS-CoV-2, causante di e malesa conoci como Covid-19, toch awe a registra un leve aumento den e cantidad di caso activo.
Segun resumen di Departamento di Salubridad Publico DVG riba e desaroyo di pandemia di coronavirus na Aruba, ayera a registra un total di 14 caso nobo di Covid-19, di cual 5 no ta residente di Aruba. Ademas, 12 persona a recupera di e malesa, y asina ta keda na 71 caso activo, un aumento leve desde e 67 caso activo riba dialuna, dia cu a anuncia eliminacion di toque de queda, entre otro cambio di protocol.
Igualmente, DVG a informa cu e cantidad total di testnan ehecuta ayera na e diferente localidadnan na Aruba, entre otro laboratorio di hospital, laboratorionan priva y aeropuerto ta 467 test. E tasa di positividad, (‘Positivity rate’) entre nos residentenan ta 8%. E cantidad di fayecido relaciona cu Covid-19 no a conoce aumento, y ta keda na 107.
