Ayera atardi, a tuma luga e firmamento di Letter of intent (LOI) entre Refineria di Aruba (RdA), Consorcio Quanten y compania Eagle LNG pa cuminsa opera refineria di Aruba cu e presencia di prome minister Evelyn Wever-Croes, algun parlamentarionan, ministernan y miembronan di e companianan aki.
Pa cu esaki, prome minister a menciona cu ayera tabata un dia hopi importante, cu nan ta ‘cautelosamente’ optimista y contento cu nan a yega asina leu, el a trece dilanti cu gobierno a cuminsa un proceso di loke nan ta yama “Request expression of interest” na comienso di pandemia caminda cu nan a haci un invitacion na inversionistanan local y internacional pa nan expresa nan interes den un proyecto na Aruba.
Asina mes, el a señala cu esaki tabata trata di un proyecto cu sea ta di reapertura di refineria of otro proyectonan cu por genera e mesun desaroyo economico cu nan ta buscando den un refineria.
E proceso aki, segun prome minister e gobierno no a haci’e pa motibo cu gobierno riba su mes a institui un comision independiente pa haci e trabou aki, e comision aki a wordo lidera pa Renny Arends cu ta director interino di Refineria di Aruba (RdA) y den comision tabatin e personanan cu experticio riba tereno di refineria, experticio huridico, experticio economico y di medio ambiente.
“Nos a scoge un grupo asina diverso pa asina por tene na cuenta cu tur aspecto cu nos tabata buscando”, prome minister a bisa.
Di mesun manera, el a informa cu nan a publica e anuncio di manera internacional y localmente tambe na unda nan a haya hopi interes y despues di e procedura totalmente independiente den e man di e comision, gobierno dos siman a haya e conseho pa continua pa e siguiente fase.
E siguiente fase, segun loke prome minister a declara ta trata di fase di negociacion na unda ta trata di dos compania como Quanten y Eagle LNG cu a pasa e proceso di Request expresion of interest, nan proyectonan a wordo evalua, tabatin varios conversacion cu nan pa asina nan por a bin y mira kico ta lo cual ta loke tin nan Aruba, “nan no a spanta y core bay, nan a bolbe y nan a keda”, prome minister a sigura.
Na e momentonan aki e dos compania aki a wordo scogi pa bay den e siguiente fase di negociacion, caminda cu lo bay trata e detayenan di un acuerdo, tambe ta e fase e cual ta bay mira e forsa financiero y pa mira con ta bay haci cu e proyecto aki na Aruba.
E fase aki ta cuminsa na e momentonan aki y pa e motibo ey ambos compania tabata presente pa firma e documentonan y asina nan por drenta den un fase nobo.
“Tabatin momentonan cu mi tabata duda cu nos tabata yega asina leu, pero akinan nos tin companianan serio cu ta interesa den yuda nos desaroya nos economia” prome minister a afirma.
Ademas, el a trece dilanti cu Aruba na e momentonan aki tin mester di tur ayudo cu por haya pa por lanta e pais bek economicamente, “nos ta mirando un etapa nobo cu diferente posibilidadnan nobo cu ta bin pa nos y mi ta espera cu den etapa cu nos ta drenta den negociacion ta un etapa tambe fructifero”, el a señala.
Pa loke ta trata esaki, por a mira hopi comentario riba rednan social cu tin di haber cu e restart di refineria, opinionnan tabata wordo dividi na unda un parti di comunidad a expresa riba e anuncio aki, algun di nan a trece dilanti cu esaki ta bay trece un bon futuro pa Aruba y cu tin cu keda positivo pa loke ta trata e parti economico cu esaki ta nifica.
Di otro banda, tambe tabatin comentarionan adverso na unda a manifesta cu nan ta espera cu esaki no ta un speransa falso pa pueblo di Aruba.
