Cu e obhetivo di inspira hende pa nan explora henter e mundo y nan sigui su soñonan, Let’s go with Hyro tin mas di 3.600 siguido riba Youtube unda e ta promove Aruba, cu aunke ta un isla chikito e tin hopi pa ofrece.

Durante un entrevista cu Bon Dia Aruba a haci cu Jairo Oduber miho conoci como ‘Hyro’ el a conta cu principalmente e ta un Arubiano creador di contenido di biahe riba Youtube y Instagram, parti di loke e ta haci ta promove Aruba como destinacion turistico pero ora e ta biaha e ta comparti esaki tambe, ya cu e ta relaciona esey cu su trabou regular e cual ta un agente di biahe.

Akinan ta caminda cu e idea pa haci e videonan pa Youtube a cuminsa tambe, diferente clientenan tabata sugeri Hyro pa e graba su experiencia di biahenan y asina nan tambe por wak y kisas asina, dicidi di bishita e destinacionnan ey tambe den futuro.

Pa loke ta Aruba, e idea pa crea videonan di esey tabata t’ey for di un principio, segun loke el a conta, sinembargo su canal a cuminsa mas tanto cu videonan di su biahenan for di 2018, pero ora pandemia di Covid-19 a cuminsa el a dicidi di enfoca principalmente na Aruba considerando e situacion na e momentonan ey, cu den principio di e pandemia e tabata kier a mustra mundo con hopi Aruba tin pa ofrece na nan asina cu frontera a habri back.

Pa e bishitantenan regular esaki tabata un manera tambe pa keda al tanto di con e situacion tabata akinan, di loke ta su biahenan of tambe yama Travel Vlogs , aparte di por promove e agencia di biahe di su tata unda cu el a crece biahando rond di mundo, esaki ta un oportunidad tambe di graba su experiencianan pa su mesun recuerdo y pa por mustra famia y amistadnan.

Hyro a afirma cu el a logra di motiva hende pa biaha a traves di su videonan, den varios ocasion e ta haya comentarionan cu ta bisa cu hende tabata investiga y door di su videonan, nan a kies pa bin Aruba, “esaki ta realmente un di e miho comentarionan cu mi por haya, mi tin hende local tambe cu a kies pa destinacionnan cu mi a bishita den pasado, hasta partinan di Aruba mes cu nan no tabata conoce prome”, el a sigura.

Di loke ta trata e proposito pa haci turismo, aparte di e parti economico cu hopi hende ta enfoca riba dje actualmente, Hyro su opinion ta cu “biahamento ta un parti hopi importante pa nos salud mental”.

A traves di e diferente aspectonan manera di stress, conoce otro culturanan etc. Pero tambe descubri luganan nobo, nan naturalesa y edificionan cu den gran parti ta hopi diferente cu esun di aki na Aruba, interactua cu personanan di e pais por yuda pa compronde nan punto di bista y hasta cambia e manera di wak of pensa over di nan, ademas e no por laga afo e parti culinario tambe cu ta hopi importante y dependiendo di e destinacion, e parti historico, “asina mi por sigui menciona diferente aspectonan cu hunto ta crea e experiencia di biahe y memorianan diferente cu bo sernan keri”.

Manera ta conoci, tin hopi creador di contenido riba rednan social y Youtube pa loke ta trata turismo, Hyro a comenta cu esaki aki ta depende con personanan ta wak e, pa loke ta su contenido di Aruba e ta purba di mix e hopi, “cu otro palabra mi no ta mustra djis nos lama y hotelnan, al contrario, mi gusta mustra cosnan diferente pa asina esnan cu ta sigui mi canal por realisa cu Aruba tin hopi mas pa ofrece cu e hotel y beachnan”el a bisa.

Aparte di esey e ta haci videonan di canamento cu ta gusta tanto pa turista, bishitantenan regular, pero tambe Arubianonan den exterior cu kisas tin poco nostalgia of kier wak con e isla ta actualmente, “den mi contenido di biahe mi ta enfoca mas riba mi experiencianan personal y duna tipnan na e biaheronan, tambe mi ta purba di semper mix e contenido y mustra un tiki di tur cos, un ehempel di esaki tabata mi ultimo serie di cual mi a bay Corsou”.

Hyro a expresa cu un di e cosnan cu ta bin na su mente na principio di pandemia tabata, kico e por haci pa su pais, “esaki a motiva mi te dia di awe y mi ta purba haci’e miho cu mi por y cu tur e amor pa nos isla”

Asina mes, el a declara cu durante grabacion tin ora cosnan no ta bay exactamente manera e tabata desea y un di esakinan ta e cantidad di sushi cu el a nota ultimamente rond di e isla.

“Mi lo kier suplica cada un cu ta lesando e articulo aki pa e por haci su best den e parti aki, tambe mi ta hayando mas y mas comentario negativo over di e situacion di nos cachonan riba caya y/of cachonan los na cas, varios bishitante ta comenta cu nan a wordo ataca y cu nan no ta custuma cu esaki, mi ta kere cu a pesar cu por tin ley, e mas importante ta pa nos mes realisa cu nos por miho door di pone un tiki di nos banda y asina crea un Aruba mas limpi y tambe bira un ehempel pa loke ta nos cuido di animalnan domestico”, el a finalisa.