(AP) – Leslie Jordan, e actor ken su versitilidad a haci su persona un icono di television den comedia y drama, incluyendo e hit “Will & Grace” y “American Horror Story” a fayece. E actor gañado di Emmy, ken su videonan a converti su persona den un strea riba rednan social durante e pandemia tabatin 67 aña di edad.
“E mundo definitivamente a bira mas scur sin e luz y amor di Leslie Jordan. No solamente e tabata un mega talento y placer pa traha cune, sino cu tambe el a provee un santuario emocional na e nacion durante un di su temponan mas dificil,” un representante di Jordan a bisa den un declaracion riba dialuna.
E residente di Chattanooga, Tennessee, ken a gana un Emmy pa Actor mas impresionante den aña 2005 pa su rol como Beverly Leslie den “Will & Grace,” tabatin un rol importante den Mayim Bialik su comedia “Cll me Kat” y tabata parti di elenco di “The Cool Kids” tambe.
Jordan su otro creditonan ta inclui “Hearts Afire,” Boston Legal,” “Fantasy Island” y “The United States vs Billie Holida.” El a hunga varios rol den e serie “American Horror Story.”
Jordan a fayece dialuna den un accident na Hollywood, segun reportahenan riba e sitio web di celebridad TMZ y Los Angeles Times, citando un fuente no identifica.
“Mi curason ta kibra,” Sean Hayes a publica. “Tur hende cu a conoce su persona tabata stima su persona. Nunca nos lo mira otro persona manera e. Un talento unico cu un curason enorme.”
Jordan a genera un base di fanatico nobo den aña 2021 ora cu e resident di Los Angeles a pasa tempo durante e pandemia cu su famia. El a kibra e rutina di hopi hende publicando videonan di su persona diariamente riba Instagram.
Varios di su videonan tabata inclui su persona ta puntra “Como boso ta sinti awe?” y algun tabata inclui storia di Hollywood of su crecemento cu rumannan twin identico y nan cama. Otro videonan tabatin temanan un poco mas chistoso y divertido manera completa un ‘obstacle course.’
El a converti hopi di su memorianan y observacionnan di bida den produccionnan riba escenario.
Jordan a yega Los Angeles den aña 1982 cu “un soño y 1200 dollar den mi man,” sperando cu e lo logra su soño di bira un actor. El a ser bisa cu su estatura chikito y accento lo ta un obstaculo den e cumplimento di su soño. Sinembargo el a comproba cu esaki no lo ta e caso.
E gran cambio den su carera a bini ora cu el a hunga un rol den un episodio di e serie den aña 1989 yama “Murphy Brown.” “Ora cu e episodio aki a lansa, mi agente a yama mi persona e siguiente dia y a bisami ‘nunca mi a mira algo asina. E telefon no ta stop di zona.’”
Entre e celebridadnan cu ta recorda su persona ta Jackee Harry, Marlee Matlin y Kristen Johnston, kendenan ta yama Jordan un “persona magico.” Lynda Carter a skirbi cu “e ta pone un sonrisa riba e cara di asina hop hende, specialmente cu su videonan durante e pandemia. E tabata un gran talento y habilidad di pone tur hende hari y conecta den momentonan asina dificil.”
